ନୂଆଦିଲ୍ଲୀ ୨୨/୬ : ସୋସିଆଲ ମିଡିଆରେ ସଦାସର୍ବଦା ଚର୍ଚ୍ଚାରେ ରହିଥାନ୍ତି ମହେନ୍ଦ୍ର ସିଂହ ଧୋନୀ । ଯଦିଓ ତାଙ୍କର ଜନ୍ମ ଝାଡ଼ଖଣ୍ଡ, କିନ୍ତୁ ମନ ତାଙ୍କର ପାହାଡୀ । ମାହୀଙ୍କ ପିତା ପାନ ସିଂହ ଚାକିରୀ ପାଇଁ ହିମାଚଳ ପ୍ରଦେଶରୁ ଯାଇ ରାଂଚୀରେ ରହୁଥିଲେ । ସେହିଦିନ ଠାରୁ ତାଙ୍କର ପରିବାର ରାଞ୍ଚିରେ ରୁହନ୍ତି । ଧୋନୀ ଏବେ ହିମାଚଳ ପ୍ରଦେଶରେ ଛୁଟି ବିତାଉଛନ୍ତି ।
ହେଲେ ଏହି ଛୁଟି ସମୟରେ ତାଙ୍କୁ ଏବେ ବିଭିନ୍ନ ଲୁକରେ ଦେଖିବାକୁ ମିଳୁଛି, ଯାହାକି ସୋସିଆଲ ମିଡିଆରେ ବେଶ୍ ଭାଇରାଲ ହେଉଛି । ହିଲ୍ସର ରାଣୀ ଶିମଲାରେ ପହଞ୍ଚିବା ପରେ ଧୋନି ଶିମଲାର ବାଇପାସ୍ ରୋଡ୍ର କାନଲୋଗରେ ରହିଛନ୍ତି । ସେଠାରେ ତାଙ୍କ ସଂଗରେ ପତ୍ନୀ ସାକ୍ଷୀ ଏବଂ ଝିଅ ଜିଭା ମଧ୍ୟ ତାଙ୍କ ସହିତ ଅଛନ୍ତି ।
ମାହିଙ୍କ ପ୍ରଶଂସକଙ୍କୁ ଯେମିତି ସୂଚନା ମିଳିଥିଲା ଯେ, ତାଙ୍କର ପ୍ରିୟ କ୍ରିକେଟର ଶିମଲାରେ ବୁଲୁଛନ୍ତି । ତାଙ୍କର ଟିକିଏ ଝଲକ ପାଇବାକୁ ଲୋକେ ଅସ୍ତବ୍ୟସ୍ତ ହୋଇପଡ଼ିଥିଲେ । ତେବେ ଦେଖିବାକୁ ମିଳିଥିଲା ଧୋନୀଙ୍କର ଏକ ଅନୋଖା ଲୁକ୍ । ବଡ଼ ନିଶ ଓ ହିମାଚଳୀ ଟୋପି ତାଙ୍କର ଲୁକକୁ ଦେଇଛି ସ୍ୱତନ୍ତ୍ର ପରିଚୟ । ତେବେ ମାହି ମଧ୍ୟ ନିଜର ପ୍ରଶଂସକଙ୍କୁ ନିରାଶ କରିନଥିଲେ ।
ନିଜର ବନ୍ଧୁଙ୍କ ସହିତ ଏକାଠି ଉଠାଇଥିଲେ ଫଟୋ । ଆଉ ତାଙ୍କୁ ଭେଟିବାକୁ ଆସିଥିବା ଜଣେ ପ୍ରଶଂସକ ତାଙ୍କୁ ୪ଟି କ୍ରିକେଟ ବ୍ୟାଟ ଉପହାର ଦେଇଥିଲା । ଧୋନୀ ପ୍ରଶଂସକଙ୍କୁ ବହୁ ପ୍ରଶଂସା କରିଥିଲେ । ଏହ ବ୍ୟାଟ ଗୁଡ଼ିକ ଶିମଲାରେ ତିଆରି ହୋଇଥିଲା ।
