ଲଣ୍ଡନ : ରୋଚକ ମୋଡ଼ରେ ପହଞ୍ଚିଛି ଓଭାଲ ଟେଷ୍ଟ । ପ୍ରଥମ ଇନିଂସରେ ଭାରତ ମାତ୍ର ୧୯୧ ରନରେ ଅଲଆଉଟ ହେବା ପରେ ଇଂଲଣ୍ଡ ମଧ୍ୟ ସମାନ ଦଶା ଭୋଗିବାକୁ ଯାଉଛି । ଇଂଲଣ୍ଡର ସ୍କୋର ଏବେ ୯୪ ରନ ହୋଇଥିବାବେଳେ ଦଳ ୫ଟି ଓ୍ବିକେଟ୍ ହରାଇଛି । ଗୁରୁତ୍ବପୂର୍ଣ୍ଣ କଥା ହେଉଛି ଜୋ ରୁଟଙ୍କ ସମେତ ଇଂଲଣ୍ଡର ସବୁ ଆଗଧାଡ଼ିର ବ୍ୟାଟ୍ସମ୍ୟାନ ପାଭିଲିୟନ ଫେରିଛନ୍ତି । ଏବେ କ୍ରିଚରେ ଓଲି ପୋପ ଓ ଜନି ବେୟାରଷ୍ଟୋ ଅଛନ୍ତି । ଭାରତର ଦୁଇ ଦ୍ରୁତ ବୋଲର ଉମେଶ ଯାଦବ ଓ ଯଶପ୍ରୀତ ବୁମରା ଭଲ ବୋଲିଂ କରି ଭାରତୀୟ ଦଳର ସ୍ଥିତିକୁ ମଝବୁତ କରିଛନ୍ତି । ଯାଦବ ୩ଟି ଓ ବୁମରା ୨ଟି ଓ୍ବିକେଟ ନେଇଛନ୍ତି ।
ଗତକାଲି ଇଂଲଣ୍ଡ ଟସ ଜିତି ଭାରତକୁ ବ୍ୟାଟିଂ ପାଇଁ ଆମନ୍ତ୍ରଣ କରିଥିଲା । ତେବେ ଗତ ମ୍ୟାଚ ପରି ଏଥର ବି ଭାରତ ବ୍ୟାଟିଂ ବିପର୍ଯ୍ୟୟର ସମ୍ମୁଖୀନ ହୋଇଥିଲା । ବିରାଟ କୋହଲିଙ୍କ ଛଡ଼ା ଅନ୍ୟ କୌଣସି ଆଗଧାଡ଼ିର ଭାରତୀୟ ବ୍ୟାଟ୍ସମ୍ୟାନ କ୍ରିଜରେ ଅଧିକ ସମୟ ତିଷ୍ଠି ପାରିନଥିଲେ । ତେବେ ନୈରାଶ୍ୟଜନକ ଭାରତୀୟ ବ୍ୟାଟିଂ ମଧ୍ୟରେ କିଛିଟା ଚମକ ଖେଳାଇଦେଇଥିଲେ ଅଲରାଉଣ୍ଡର ଶାର୍ଦ୍ଦୁଲ ଠାକୁର । ସେ ମାତ୍ର ୩୬ ବଲରେ ୫୭ ରନ କରି ସ୍କୋରକୁ କିଛିଟା ସମ୍ମାନଜନକ ସ୍ତରକୁ ନେଇଯାଇଥିଲେ । ସେ ଆଉଟ ହେବାର ଅଳ୍ପ କିଛି ସମୟ ପରେ ଭାରତ ୧୯୧ ରନରେ ଅଲଆଉଟ ହୋଇଯାଇଥିଲା ।
