ଇନ୍ଦୋର ୨୯/୧୨ : ମଧ୍ୟ ପ୍ରଦେଶର ଇନ୍ଦୋରରେ ରାମ ମନ୍ଦିର ନିର୍ମାଣ ପାଇଁ ହେଉଥିବା ରାଲିରେ ଅଭାବନୀୟ ଘଟଣା ଘଟିଛି । ରାମ ମନ୍ଦିର ନିର୍ମାଣ ପାଇଁ ବାହାରିଥିବା ରାଲିକୁ କିଛି ବ୍ୟକ୍ତି ପଥର ମାଡ କରିଥିବା ସୂଚନା ମିଳିଛି । ଏହି ଘଟଣାରେ ୧୨ ରୁ ୧୫ ଜଣ ବ୍ୟକ୍ତି ଆହତ ହୋଇଥିବା ସୂଚନା ମିଳିଛି ।
ଖବର ପାଇ ସ୍ଥାନୀୟ ପୋଲିସ ଘଟଣାସ୍ଥଳରେ ପହଞ୍ଚିବା ସହ ଉତ୍ତ୍ୟକ୍ତ ଲୋକଙ୍କୁ ଆୟତ କରିବାରେ ସକ୍ଷମ ହୋଇଛି । ସ୍ଥାନୀୟ ଅଞ୍ଚଳରେ ବ୍ୟାପକ ପୋଲିସ ଫୋର୍ସ ମୁତୟନ କରାଯାଇଛି । ଡିସେମ୍ବର ୨୬ରେ ଉଜ୍ଜେନ୍ରେ ମଧ୍ୟ ରାମ ମନ୍ଦିରକୁ ନେଇ ବାହାର କରାଯାଇଥିବା ରାଲି ଉପରେ ଆକ୍ରମଣ କରାଯାଇଥିଲା ।
ରାମ ମନ୍ଦିର ନିର୍ମାଣ ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଶୀଳାନ୍ୟାସ କରିବା ପରେ ଏଥି ପାଇଁ କିଛି ଅର୍ଥ ଆଦାୟ ପାଇଁ ଧନ ସଂଗ୍ରହ ଅଭିଯାନ ଆରମ୍ଭ କରାଯାଇଛି । ଦେଶର ବିଭିନ୍ନ ସ୍ଥାନରୁ ଏଥିପାଇଁ ସ୍ବତନ୍ତ୍ର ଭାବେ ରାଲି କରାଯାଇ ଅର୍ଥ ସଂଗ୍ରହ କରାଯାଉଛି । ତେବେ ଇନ୍ଦୋରରୁ ବାହାରିଥିବା ରାଲି ଗୌତମପୁରା ଅଞ୍ଚଳର ଚନ୍ଦନ ଖେଡୀ ଗାଁରେ ପହଞ୍ଚିବା ପରେ କିଛି ଲୋକ ରାଲିରେ ବ୍ୟବହୃତ ଗାଡି ଉପରକୁ ପଥର ମାଡ କରିଥିଲେ । ଘଟଣାରେ ପ୍ରାୟ ୧୨ ରୁ ୧୫ ଜଣ ଆହତ ହୋଇଥିବା ସୂଚନା ମିଳିଛି । ସେମାନଙ୍କୁ ତୁରନ୍ତ ଚିକିତ୍ସା ପାଇଁ ହସ୍ପିଟାଲରେ ଭର୍ତ୍ତି କରାଯାଇଛି ।
ଏହା ପୂର୍ବରୁ ଉଜ୍ଜେନ୍ରେ ମଧ୍ୟ ରାମ ମନ୍ଦିର ପାଇଁ ବାହାରିଥିବା ରାଲି ଉପରେ ଆକ୍ରମଣ କରାଯାଇଥିଲା । ଏହି ଘଟଣା ଉଜ୍ଜେନ୍ର ବଗେମବାଗ୍ ଅଞ୍ଚଳରେ ଘଟିଥିଲା । ଯେଉଁଥିରେ ସଂଘ ପରିବାରର କାର୍ଯ୍ୟକର୍ତ୍ତାଙ୍କ ଉପରେ ଆକ୍ରମଣ କରାଯାଇଥିଲା । ଏହି ମାମଲାରେ ପୋଲିସ ୬ ଜଣଙ୍କୁ ଗିରଫ କରିଥିଲା ।
