ଭୁବନେଶ୍ଵର ୦୮।୧୧: ମୌସୁମୀ ଫେରିଯିବା ପରେ ନଭେମ୍ବର ମାସ ଆରମ୍ଭ ହେବା ସହିତ ରାଜ୍ୟରେ ଶୀତର ଆଗମନ ଘଟିଛି। ଦିନକୁ ଦିନ ତାପମାତ୍ରା ହ୍ରାସ ପାଇବା ସହିତ ଥଣ୍ଡା ଅନୁଭୂତ ହେବାରେ ଲାଗିଛି। ସନ୍ଧ୍ୟା ହେଲେ ରାଜ୍ୟର ଅନେକ ଜିଲ୍ଲାରେ ବିନା ଶୀତବସ୍ତ୍ରରେ ବାହାରକୁ କୋଡ କାଢି ହେଉନି। ଏବେ ରାଜ୍ୟର ୧୧ଟି ସହରର ତାପମାତ୍ରା ୧୫ ଡିଗ୍ରୀ ତଳେ ରହିଛି। ୯.୬ ଡିଗ୍ରୀ ସହ ସୋନପୁର ସହର ସବୁଠୁ ଥଣ୍ଡା ସହର ହୋଇଛି।
ଆଞ୍ଚଳିକ ପାଣିପାଗ କେନ୍ଦ୍ରର ସୂଚନା ଅନୁଯାୟୀ ଫୁଲବାଣୀ ଓ ଦାରିଙ୍ଗବାଡିରେ ତାପମାତ୍ରା ୧୦.୫ ଡିଗ୍ରୀ ସେଲସିୟସ ରହିଛି। ସେହି ପରି ଅନୁଗୁଳରେ ୧୧ ଡିଗ୍ରୀ, କୋରାପୁଟରେ ୧୧.୬ ଡିଗ୍ରୀ, ଭବାନୀପାଟଣାରେ ୧୨.୨ ଡିଗ୍ରୀ, ଝାରସୁଗୁଡାରେ ୧୩ ଡିଗ୍ରୀ, କେନ୍ଦୁଝରରେ ୧୩.୮ ଡିଗ୍ରୀ, ବାରିପଦାରେ ୧୪.୨ ଡିଗ୍ରୀ, ବଲାଙ୍ଗୀରରେ ୧୪.୬ ଡିଗ୍ରୀ ଓ ସମ୍ବଲପୁରରେ ପାରଦ ୧୪.୭ ଡିଗ୍ରୀ ରହିଛି।
ଗତ କିଛି ଦିନ ହେବ ରାଜଧାନୀ ଭୁବନେଶ୍ଵର ଓ କଟକରେ ରାତିରେ ଶୀତ ଅନୁଭୂତ ହେଉଛି। ରାଜଧାନୀରେ ତାପମାତ୍ରା ୧୮ ଡିଗ୍ରୀ ରହିଥିବା ବେଳେ କଟକରେ ୧୬.୮ ଡିଗ୍ରୀ ରହିଛି। ଆଗକୁ ଆହୁରି ଶୀତର ପ୍ରକୋପ ବଢିପାରେ ବୋଲି କୁହାଯାଉଛି।
