ଭରତପୁର ୧୦।୫: ରାଜସ୍ଥାନ ଭରତପୁରରେ ଏକ ମାମଲାରେ ନିର୍ଦ୍ଦୋଷରେ ଖଲାସ ହେବା ପରେ ଉତ୍ସବକୁ ନେଇ ଦୁଇ ଗୋଷ୍ଠୀ ମଧ୍ୟରେ ସଂଘର୍ଷ ହୋଇଛି । ଏହା ପରେ ପ୍ରାୟ ଅଧ ଘଣ୍ଟା ଯାଏଁ ପଥର ଫିଙ୍ଗିଫିଙ୍ଗି ହୋଇଥିଲେ ଦୁଇ ଗୋଷ୍ଠୀ । ଉପଦ୍ରବକାରୀମାନେ ଗାଡି ଭଙ୍ଗାରୁଜା ମଧ୍ୟ କରିଥିଲେ । ବିଳମ୍ବିତ ରାତିରେ ପୋଲିସ ସମ୍ପୃକ୍ତ ଅଞ୍ଚଳକୁ ସିଲ୍ କରିଦେଇଥିଲା ।
ଉଲ୍ଲେଖଯୋଗ୍ୟ ଯେ, ପଥର ଫିଙ୍ଗିବା ବେଳେ ୨ ଜଣ ଆହତ ହୋଇଛନ୍ତି । ପ୍ରଶାସନ ସଂପୃକ୍ତ ଅଞ୍ଚଳକୁ ପୋଲିସ ଛାଉଣୀ କରିଦେିଛି । ଘଟଣାସ୍ଥଳରେ ବ୍ୟାପକ ପୋଲିସ ଫୋର୍ସ ମୁତୟନ କରାଯାଇଛି । ଛାନ୍ଭିନ୍ ବେଳେ ବୋତଲ ଏବଂ ପଥର ଉଦ୍ଧାର ହୋଇଛି । ଏହି ଘଟଣା ମଥୁରା ଗେଟ୍ ଥାନା ଅଞ୍ଚଳ ବୁଦ୍ଧ ହାଟରେ ଘଟିଛି । ଏହା ପୂର୍ବରୁ ୨୦୧୩ ମସିହାରେ ମଧ୍ୟ ଝଗଡା ହୋଇଥିଲା ।
୨୦୧୩ ମସିହାରେ ଦୁଇ ସମ୍ପ୍ରଦାୟର ପରିବାର ମଧ୍ୟରେ ମାଂସ ଦୋକାନକୁ ନେଇ ବିବାଦ ହୋଇଥିଲା । ତତ୍କାଳୀନ ପ୍ରଶାସନ ମାଂସ ଦୋକାନ ବନ୍ଦ କରିଦେଇଥିଲା । ପରେ ଏହି ଘଟଣାରେ ଉଭୟ ପକ୍ଷ ତରଫରୁ ମାମଲା ରୁଜୁ ହୋଇଥିଲା । ତେବେ ଏହି ମାମଲାରେ ସୋମବାର ଦିନ କୋର୍ଟ ଗୋଟିଏ ପକ୍ଷ ଉପରେ ୬ଶହ ଟଙ୍କା ଜରିମାନା ଲଗାଇଥିଲେ । ଫଳରେ ଅନ୍ୟ ପକ୍ଷର ଲୋକମାନେ ଉତ୍ସବ ପାଳନ କରିଥିଲେ । ଅଭିଯୋଗ ହୋଇଛି ଯେ, ସେହି ସମୟରେ ମାଂସ ଖାଇବା ସହ ଏବଂ ମଦ ମଧ୍ୟ ପିଉଥିଲେ ।
ଏହାକୁ ବିରୋଧ କରି ଅନ୍ୟ ପକ୍ଷଙ୍କ ପକ୍ଷରୁ ପଥର ଫିଙ୍ଗା ଯାଇଥିଲା । ଫଳରେ ଉଭୟ ଗୋଷ୍ଠୀ ମଧ୍ୟରେ ପଥର ଫିଙ୍ଗାଫିଙ୍ଗି ଚାଲିଥିଲା । ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚିଥିଲା । ପରେ ପୋଲିସ ଏହି ଘଟଣାରେ ୧୫ଜଣଙ୍କୁ ଗିରଫ କରିଥିବା ଜଣାପଡିଛି ।
