ଇସଲାମାବାଦ: ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ପିଟିଆଇ ମୁଖ୍ୟ ଇମ୍ରାନ୍ ଖାନ୍ ଏବଂ ପୂର୍ବତନ ବୈଦେଶିକ ମନ୍ତ୍ରୀ ତଥା ପିଟିଆଇର ଉପାଧ୍ୟକ୍ଷ ଶାହ ମହମ୍ମଦ କୁରେଶୀଙ୍କୁ ପାକିସ୍ତାନର ଏକ ଅଦାଲତ ବିବାଦୀୟ ସାଇଫର୍ (ଗୁପ୍ତ ଦସ୍ତାବିଜ୍ ଲିକ୍) ମାମଲାରେ ୧୦ ବର୍ଷ ଜେଲ୍ ଦଣ୍ଡାଦେଶ ଶୁଣାଇଛନ୍ତି। ଦଳର ଜଣେ ମୁଖପାତ୍ର ଗଣମାଧ୍ୟମକୁ କହିଛନ୍ତି, ସାଇଫର ମାମଲାରେ ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାନ ଏବଂ ପିଟିଆଇ (ପାକିସ୍ତାନ ତେହରିକ-ଏ-ଇନସାଫ) ଉପାଧ୍ୟକ୍ଷ କୁରେଶୀଙ୍କୁ ୧୦ ବର୍ଷ ଲେଖାଏଁ ଜେଲ ଦଣ୍ଡାଦେଶ ହୋଇଛି।
ଇମ୍ରାନଙ୍କ ପାକିସ୍ତାନ ତେହରିକ-ଏ-ଇନସାଫ ପାର୍ଟିର ମୁଖପାତ୍ର ଜୁଲଫିକର ବୁଖାରିଙ୍କ କହିବା ଅନୁଯାୟୀ, ଇମ୍ରାନ୍ ଖାନ୍ ଏବଂ ତାଙ୍କ ଡେପୁଟି କୁରେଶୀଙ୍କର ଏହି ମାମଲାରେ ମଙ୍ଗଳବାର ରାୟ ବିରୋଧରେ ଆବେଦନ କରିବାର ଅଧିକାର ରହିଛି। ପାକିସ୍ତାନ କ୍ରିକେଟ ଦଳର ପୂର୍ବତନ ଅଧିନାୟକ ଇମ୍ରାନ ଖାନଙ୍କୁ ୨୦୨୨ ଏପ୍ରିଲରେ ସଂସଦରେ ଅନାସ୍ଥା ପ୍ରସ୍ତାବ ଜରିଆରେ ବହିଷ୍କାର କରାଯାଇଥିଲା। ଖାନ୍ ଏବେ ଏକ ଦୁର୍ନୀତି ମାମଲାରେ ୩ ବର୍ଷ ଜେଲ୍ ଦଣ୍ଡ ଭୋଗୁଛନ୍ତି।
ପାକିସ୍ତାନରେ ଫେବ୍ରୁଆରି ୮ରେ ହେବାକୁ ଥିବା ସଂସଦୀୟ ନିର୍ବାଚନ ପୂର୍ବରୁ ଏହି ଘଟଣା ଘଟିଛି। ଯଦିଓ ଇମ୍ରାନ୍ ଖାନ୍ ପାକିସ୍ତାନ ନିର୍ବାଚନରେ ଭୋଟ୍ ଦେବେ ନାହିଁ, ତଥାପି ତୃଣମୂଳ ସ୍ତରରେ ତାଙ୍କର ବହୁ ସମର୍ଥକ ଥିବାରୁ ଏବଂ ତାଙ୍କର ସକରାରବିରୋଧୀ ବୟାନ ଯୋଗୁଁ ସେ ଏକ ବିରାଟ ରାଜନୈତିକ ଶକ୍ତି ହୋଇ ରହିଛନ୍ତି। ଇମ୍ରାନ୍ ଖାନ୍ ଅଭିଯୋଗ କରିଛନ୍ତି ଯେ ତାଙ୍କ ବିରୋଧରେ ଥିବା ଆଇନଗତ ମାମଲାଗୁଡ଼ିକ ତାଙ୍କୁ ଲଢ଼େଇରୁ ବାଦ୍ ଦେବାପାଇଁ ଭୋଟ୍ ପୂର୍ବରୁ ଏକ ଷଡ଼ଯନ୍ତ୍ର। ଜେଲରେ ଥିବା ଇମ୍ରାନ ଖାନ ଓ ତାଙ୍କ ଦଳର ଅନ୍ୟ ଶୀର୍ଷ ନେତୃବୃନ୍ଦଙ୍କୁ ଯଦି ହିଂସାତ୍ମକ ଘଟଣା ଏବଂ ସିକ୍ରେଟ୍ ଆକ୍ଟ ଉଲ୍ଲଂଘନ ମାମଲାରେ ଦୋଷୀ ସାବ୍ୟସ୍ତ କରାଯାଏ, ତେବେ ତାଙ୍କ ପାର୍ଟି ପିଟିଆଇକୁ ନିଷିଦ୍ଧ କରାଯାଇପାରେ।
ମଙ୍ଗଳବାରର କୋର୍ଟ ରାୟ ପରେ ପିଟିଆଇ ପାକିସ୍ତାନରେ ସାଧାରଣ ନିର୍ବାଚନ ଲଢ଼ିବାର ସମ୍ଭାବନା କ୍ଷୀଣ ମନେ ହେଉଛି। ଇମ୍ରାନ୍ ଖାନ୍ ଏବଂ ପିଟିଆଇ ଉପାଧ୍ୟକ୍ଷ ଶାହ ମହମ୍ମଦ କୁରେଶୀ ରାୱଲପିଣ୍ଡିର ଆଡିଆଲା ଜେଲରେ ୬ ମାସରୁ ଅଧିକ ସମୟ ଧରି ବନ୍ଦୀ ଅଛନ୍ତି। ୨୦୨୩ ମେ ମାସରେ ଇମ୍ରାନ୍ ଖାନ୍ ଗିରଫ ହେବା ପରେ ପାକିସ୍ତାନରେ ହିଂସାତ୍ମକ ବିକ୍ଷୋଭ ଦେଖିବାକୁ ମିଳିଛି। ସେବେଠାରୁ କର୍ତ୍ତୃପକ୍ଷ ତାଙ୍କ ସମର୍ଥକ ଓ ଦଳ ଉପରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରିଆସୁଛନ୍ତି। ପାକିସ୍ତାନ ନିର୍ବାଚନ କମିସନ କେବଳ ପିଟିଆଇର କ୍ରିକେଟ ବ୍ୟାଟ୍ ଚିହ୍ନକୁ ଛଡ଼ାଇ ନେଇନାହାନ୍ତି ବରଂ ବିଭିନ୍ନ ବାହାନାରେ ଉଭୟ ଖାନ୍ ଓ କୁରେଶୀଙ୍କ ନାମାଙ୍କନପତ୍ରକୁ ମଧ୍ୟ ଖାରଜ କରିଦେଇଛନ୍ତି।
