ରାଉରକେଲା: ଗତ ୧୦ ତାରିଖରୁ ରାଉରକେଲାରେ ବ୍ୟାପିଥିବା ହଇଜା ସଂକ୍ରମଣରେ ପ୍ରାଣ ହରାଇଥିବା ଲୋକଙ୍କୁ କ୍ଷତିପୂରଣ ଦାବିରେ ବିଜେପି ପକ୍ଷରୁ ମୁଖ୍ୟ ଶାସନ ସଚିବଙ୍କୁ ପତ୍ର ଲେଖାଯାଇଛି। ବରିଷ୍ଠ ବିଜେପି ନେତା ନିହାର ରାୟ ଓ ଜଗବନ୍ଧୁ ବେହେରାଙ୍କ ନେତୃତ୍ବରେ ଆଜି ଏନେଇ ବିଜେପି ପକ୍ଷରୁ ମହାନଗର ନିଗମ କାର୍ଯ୍ୟାଳୟ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରାଯାଇଛି। ଏହି ସମୟରେ ବିଜେପି କର୍ମୀ ଅଫିସକୁ ଧସେଇ ପଶିବାକୁ ଉଦ୍ୟମ କରୁଥିବା ବେଳେ ପୁଲିସ ଅଟକାଇଥିଲା । ଯାହାକୁ ନେଇ ଉତ୍ତେଜନାମୂଳକ ପରିସ୍ଥିତି ସୃଷ୍ଟି ହୋଇଥିଲା। ଏହାପରେ ପୁଲିସ ଓ ବିଜେପି କର୍ମୀଙ୍କ ମଧ୍ୟରେ ଧସ୍ତାଧସ୍ତି ହୋଇଥିଲେ।
ମୃତକଙ୍କ ପରିବାରକୁ ୨୦ ଲକ୍ଷ ଟଙ୍କା ଲେଖାଏ କ୍ଷତିପୂରଣ ଦେବାକୁ ଦାବି କରିଛି ବିଜେପି। ଏହାଛଡ଼ା ମୃତକଙ୍କ ପରିବାରରୁ ଜଣଙ୍କୁ ସରକାରୀ ଚାକିରି ଦେବାକୁ ବି ରାଜ୍ୟ ସରକାରଙ୍କ ନିକଟରେ ଦାବି କରିଛି ଦଳ।
![](https://sambad.in/wp-content/uploads/2023/12/c22d8eff-8782-46db-976e-5b6949e05d96.jpeg)
ଏହାଛଡ଼ା ପୀଡ଼ିତମାନଙ୍କୁ ବାହାରର ବଡ଼ ଡାକ୍ତରଖାନାରେ ଚିକିତ୍ସା ବ୍ୟବସ୍ଥା କରିବା ସହ ଆବଶ୍ୟକସ୍ଥଳରେ କେନ୍ଦ୍ରୀୟ ସହାୟତା ନେବାକୁ ବି ଦାବି କରିଛି ବିଜେପି। ରାଉରକେଲାରେ ପାନୀୟ ଜଳସଂକ୍ରମଣରେ ଏଯାଏ ୧୭ଜଣଙ୍କ ଜୀବନହାନି ଘଟିଥିବା ଦଳ ଦାବି କରିଛି।