ମଧ୍ୟପ୍ରଦେଶ ୨୦/୧୦: କାନ୍ଧରେ ଝିଆରୀର ମୃତଦେହ ବୋହିଲେ ଦାଦା । ଏଭଳି ଏକ ହୃଦୟ ବିଦାରକ ଘଟଣା ସାମ୍ନାକୁ ଆସିଛି ମଧ୍ୟପ୍ରଦେଶ ଛତରପୁରରୁ । ଯେଉଁଠାରେ ଆମ୍ବୁଲାନ୍ସ ଅଭାବରୁ ଜଣେ ବ୍ୟକ୍ତି ନିଜ ଝିଆରୀଙ୍କୁ କାନ୍ଧରେ ବୋହି ଘରକୁ ନେଇଯାଉଥିବାର ଘଟଣା ଏବେ ସାମ୍ନାକୁ ଆସିଛି । ତେବେ ଘଟଣା ଗଣମାଧ୍ୟମରେ ଆସିବାପରେ ସଂପୃକ୍ତ ବିଭାଗ ତରଫରୁ ସହାୟତା ପାଇଁ ଚେଷ୍ଟା କରାଯାଇଥିଲା ।
ସୂଚନା ଅନୁଯାୟୀ, ମୃତକ ରାଧାଙ୍କୁ ଭୀଷଣ ଜ୍ୱର ହୋଇଥିଲା ଯାହାପରେ ତାଙ୍କୁ ବକ୍ସଓ୍ୱାହା କମ୍ୟୁନିଟି ହେଲଥ ସେଣ୍ଟରରେ ଭର୍ତ୍ତି କରାଯାଇଥିଲା । ସେଠାରେ ତାଙ୍କ ସ୍ବାସ୍ଥ୍ୟବସ୍ଥାରେ କୌଣସି ଉନ୍ନତି ନହବୋରୁ ତାଙ୍କୁ ଜିଲ୍ଲା ହସ୍ପିଟାଲକୁ ପଠାଯାଇଥିଲା । ଯେଉଁଠାରେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ହୋଇଥିଲା।
କିନ୍ତୁ ଆମ୍ବୁଲାନ୍ସ ନଥିବାରୁ ପରିବାର ଲୋକ କୌଣସି ମତେ ମୃତଦେହ ବକ୍ସଓ୍ୱାହା ନେବାରେ ସକ୍ଷମ ହୋଇଥିଲେ। କିନ୍ତୁ ସେଠାରୁ ୪ କିମି ଦୂର ନିଜ ଗ୍ରାମକୁ ନେବାକୁ କୌଣସି ସୁବିଧା ମିଳିନଥିଲା । ପରିବାର ଅନେକ ଅଧିକାରୀଙ୍କୁ ସାହାଯ୍ୟ ମାଗିଥିଲେ ବି କେହି ଧ୍ୟାନ ଦେଇନଥିଲେ ।
ଶେଷରେ ମୃତକଙ୍କ ଦାଦା, ଝିଆରୀର ମୃତ ଦେହକୁ କାନ୍ଧରେ ବୋହି ଗାଁ ଅଭିମୁଖେ ଚାଲି ଚାଲି ବାହାରିଥିଲେ। ଅବଶ୍ୟ ଘଟଣା ଗଣମାଧ୍ୟମରେ ଆସିବାପରେ ନଗର ନିଗମ ପକ୍ଷରୁ ସହାୟତା ଯୋଗାଇ ଦିଆଯାଇଥିଲା। ସେପଟେ ଏହି ଘଟଣାରେ ଛତରପୁର ଚିଫ୍ ମେଡିକାଲ ଅଫିସର ଡ. ବିଜୟ ପାଥୋରିଆ ଏହି ମାମଲାରେ ଅଧିକାରୀଙ୍କ ସହ କଥାହେବା ନେଇ କହିଛନ୍ତି।
