ନୂଆଦିଲ୍ଲୀ ୦୭/୦୩: ଭାରତ ଶ୍ରୀଲଙ୍କାକୁ ପ୍ରଥମ ଟେଷ୍ଟରେ ଶୋଚନୀୟ ଭାବେ ପରାସ୍ତ କରିଛି । ଭାରତ ଭ୍ରମଣକାରୀ ଦଳକୁ ୨୨୨ ରନ୍ ଓ ଗୋଟିଏ ଇନିଂସରେ ମାତ୍ ଦେଇଛି । ଦଳର ବିଜୟରେ ରବୀନ୍ଦ୍ର ଜାଡେଜାଙ୍କ ବଡ ଯୋଗଦାନ ଥିଲା । ସେ ପ୍ରଥମ ଇନିଂସରେ ୧୭୫ ରନ୍ କରିଥିବା ବେଳେ ମୋଟ୍ ୯ଟି ଓ୍ୱିକେଟ୍ ନେଇଥିଲେ ।
ତେବେ ଏକ ବଡ ରେକର୍ଡ ପ୍ରତିଷ୍ଠା କରିବାଠୁ ଜାଡେଜା ଗୋଟିଏ ଓ୍ୱିକେଟ୍ ଦୂରରେ ରହିଯାଇଥିଲେ । ଯଦି ସେ ଗୋଟିଏ ଓ୍ୱିକେଟ୍ ନେଇଥାନ୍ତେ ତେବେ ୧୫୦ରୁ ଅଧିକ ରନ୍ ଓ ୧୦ ଓ୍ୱିକେଟ୍ ନେଇଥିବା ବିଶ୍ୱର ପ୍ରଥମ ଖେଳାଳି ହୋଇପାରିଥାନ୍ତେ । ଏବେସୁଦ୍ଧା କେହି ଖେଳାଳି ଟେଷ୍ଟରେ ୧୫୦ରୁ ଅଧିକ ରନ୍ ଓ ୧୦ ଓ୍ୱିକେଟ୍ ନେଇ ନାହାଁନ୍ତି ।
ପୂର୍ବରୁ କେବଳ ଆଲନ ଡେଭିଡସନ, ଇଆନ ବାଥମ, ଇମ୍ରାନ ଖାନ୍ ଓ ଶାକିବ ଅଲ ହାସନ ଏହି ରେକର୍ଡର ପାଖାପଖି ପହଁଚିଥିଲେ । ଡେଭିଡସନ ୧୯୬୦ରେ ଓ୍ୱେଷ୍ଟ ଇଣ୍ଡିଜ ବିପକ୍ଷରେ ୧୨୪ ରନ୍ କରିବା ସହ ୧୧ ଓ୍ୱିକେଟ୍ ନେଇଥିଲେ ।
ସେହିପରି ଇଆନ ବାଥମ ଭାରତ ବିପକ୍ଷରେ ୧୩ ଓ୍ୱିକେଟ୍ ନେବା ସହ ୧୧୪ ରନ୍ କରିଥିଲେ । ୧୯୮୩ରେ ଇମ୍ରାନ ଖାନ ୧୧ ଓ୍ୱିକେଟ୍ ନେବା ସହ ୧୧୧ ରନ୍ କରିଥିଲେ । ସେହିପରି ଶାକିବ ଅଲ ହସନ ୨୦୧୪ରେ ୧୪୩ ରନ୍ କରି ଦଶ ଓ୍ୱିକେଟ୍ ନେଇଥିଲେ । କିନ୍ତୁ କେହି ବ୍ୟାଟର ୧୫୦ ରନ୍ କରି ୧୦ କିମ୍ବା ଅଧିକ ଓ୍ୱିକେଟ୍ ନେଇ ନାହାଁନ୍ତି ।
