ପାଲଘର : ଆଦିପୁରୁଷକୁ ନେଇ ବିବାଦ ଥମିବାର ନାଁ ଧରୁନି। ମହାରାଷ୍ଟ୍ରର ପାଲଘରରେ ଏକ ମଲ୍ଟିପ୍ଲେକ୍ସରେ ସିନେମା ପ୍ରଦର୍ଶନ ଚାଲିଥିବା ବେଳେ କେତେକ ହିନ୍ଦୁ ସଂଗଠନର ସଦସ୍ୟ ବିଶୃଙ୍ଖଳା ସୃଷ୍ଟି କରିଥିଲେ। ସେମାନେ ମଲ୍ଟିପ୍ଲେକ୍ସ କର୍ମଚାରୀଙ୍କୁ ସିନେମା ପ୍ରଦର୍ଶନ ବନ୍ଦ କରିବାକୁ ଏବଂ ଲୋକଙ୍କୁ ହଲ୍ରୁ ବାହାରିଯିବାକୁ କହିଥିଲେ।
ରବିବାର ନାଲସପଡ଼ାଠାରେ ଏହି ଘଟଣା ଘଟିଥିଲା। ଏକ ଭିଡ଼ିଓରେ ଜଣେ ଲୋକ କହିବାର ଶୁଣାଯାଉଛି- ଆପଣ ଏଇଆ ଆପଣଙ୍କ ପିଲାଙ୍କୁ ଶିଖାଇବେ? ଆମେ ଲଜ୍ଜିତ। ଆମ ଦେବଦେବୀଙ୍କ ଅପମାନକୁ ଆମେ ସହିପାରିବୁ ନାହିଁ। କର୍ମଚାରୀମାନେ ହଲ୍ ବାହାରକୁ ଆସି କଥା ହେବା ପାଇଁ ଅନୁରୋଧ କରିଥିଲେ ମଧ୍ୟ ଲୋକଜଣକ ତାହା ଶୁଣି ନ ଥିଲେ। ସେ କହିଥିଲେ- ଆମେ ଭୀରୁ, କାପୁରୁଷ ଓ ନପୁଂସକ ନୁହଁ। ସମ୍ମାନ ରକ୍ଷା ପାଇଁ ଦରକାର ପଡ଼ିଲେ ଆମେ ଆତ୍ମବଳି ଦେବା ପାଇଁ ବି ପ୍ରସ୍ତୁତ। ହଲ୍ରୁ ବାହାରକୁ ଯିବା ବେଳେ ‘କିଛି ଲଜ୍ଜା ଥିଲେ ବାହାରିଯାଅ’ ବୋଲି ସେ ଲୋକଙ୍କୁ ଆହ୍ବାନ ଦେଇଥିଲେ। କିଛି ଲୋକ ମଧ୍ୟ ବାହାରି ଯାଇଥିଲେ। ସୂଚନାଯୋଗ୍ୟ, ଦୁର୍ବଳ ଭିଜୁଆଲ ପ୍ରଦର୍ଶନ, ଗାଉଁଲି ସଂଳାପ ଏବଂ ଅଭିନେତାମାନଙ୍କର ନିମ୍ନମାନର ଅଭିନୟକୁ ନେଇ ଆଦିପୁରୁଷ ସମାଲୋଚନାର ଶରବ୍ୟ ହୋଇଆସୁଛି। କେବଳ ଭାରତ ନୁହେଁ, ନେପାଳରେ ମଧ୍ୟ ଏହି ଫିଲ୍ମ ବିରୋଧରେ ସ୍ବର ଉଠିଛି। ସୋମବାରଠାରୁ କାଠମାଣ୍ଡୁରେ ଏହାର ପ୍ରଦର୍ଶନକୁ ନିଷିଦ୍ଧ କରାଯାଇଛି। ରବିବାର ନିର୍ମାତାଙ୍କ ପକ୍ଷରୁ କେତେକ ସଂଳାପରେ ପରିର୍ତ୍ତନ କରାଯିବ ବୋଲି କୁହାଯାଇଥିଲା।
