ଚିତ୍ରଡ଼ା ୧୧/୦୫: ‘ପୁଷ୍ପା’ ଫିଲ୍ମର ଡାଇଲଗ “ପୁଷ୍ପା ରାଜ ଝୁକେଗା ନେହିଁ” ଆଉ ‘ଗୁଣ୍ଡା ରାଜ’ । ଫିଲ୍ମରେ “ଇଲାକା ଆପୁନକା କାନୁନ୍ ବି ଆପୁନକା, କାଟ ଡାଲେଗା ” ବାସ୍ ଏତିକି ଦୁଇଟି ଡାଇଲଗ୍ କହିବା ପରେ ଜଣକୁ ଜେଲ ହାଜତକୁ ଯିବାକୁ ପଡ଼ିଲା । ଆଉ ମୟୂରଭଞ୍ଜ ଜିଲ୍ଲା ମୋରଡ଼ା ପୋଲିସ ଏମିତି ଦଫା ଲଗାଇ ଦେଲା ଯେ ଜାମିନ ବି ମିଳିଲାନି ।
୨୪ ଦିନ ଧରି ବାରିପଦା ଜେଲ୍ରେ ରହିବା ପରେ ହାଇକୋର୍ଟରୁ ଜାମିନରେ ବାହାରିଛନ୍ତି । ଘଟଣାଟି ମାର୍ଚ୍ଚ ୧୬ ତାରିଖ ଶିର୍ଷାପାଳ ଛକରେ ଘଟିଥିଲା । ଏକ ଯାତ୍ରୀବାହୀ ବସ୍ ସେଇ ଛକରେ ଅଟକିବା ପରେ ବସ୍ କଣ୍ଡକ୍ଟର ସହ ସ୍ଥାନୀୟ ଲୋକଙ୍କ ମଧ୍ୟରେ ବିଭିନ୍ନ କାରଣରୁ ବଚସା ଓ ପରେ ଗଣ୍ଡଗୋଳ ହୋଇଥିଲା । ଘଟଣାକୁ ଦୂରରେ ରହି ଜଣେ ମୋବାଇଲ ଫୋନ୍ରେ ଭିଡିଓ ରେକର୍ଡିଂ କରି ପୋଲିସକୁ ଦେଇଥିଲେ ।
ମୋରଡ଼ା ପୋଲିସ ଉକ୍ତ ଭିଡିଓ ଦେଖି ଅଭିଯୁକ୍ତକୁ ଖୋଜି ବାହାର କରି ମାମଲା ରୁଜୁ କରିଥିଲେ । ହେଲେ ଡାଏଲଗ କହିଥିବା ଯୁବକ ଚିତ୍ରଡ଼ାର ସଞ୍ଜୟ ମହାନ୍ତ ଓରଫ୍ ଭଲା କୈାଣସି ଘଟଣାରେ ସଂପୃକ୍ତି ନଥାଇ ମଧ୍ୟ ତାଙ୍କୁ ପୁଲିସ ଥାନାକୁ ଡକାଇ ଗିରଫ କରିଥିଲେ ।
ସଞ୍ଜୟ କାହାକୁ ବି ହାତ ଦେଇନି ଦୂରରେ ରହି କେବଳ ଡାଇଲଗ ବାଜି ମାରିଥିଲେ । ଭଲା ଜଣେ ଫାଷ୍ଟ ଫୁଡ୍ ଦୋକାନୀ ହୋଇଥିବାର ମାମଲାରେ ଛନ୍ଦି ହେବା ପରେ ଅର୍ଥହାନୀ ପାଇଁ ବ୍ୟବସାୟ ବନ୍ଦ ହୋଇଯାଇଛି । ଶାଳ ପତ୍ର ସିଲେଇ କରି ଯାହା ମିଳୁଛି ସେଥିରେ ପରିବାର ଗୁଜୁରାଣ ମେଣ୍ଟାଉଛନ୍ତି ।
