ଭୁବନେଶ୍ୱର : ମନ୍ଦିର ଭିତରେ ପୂଜକଙ୍କ ରାସଲୀଳା। ମହିଳାଙ୍କୁ ଅସଦାଚରଣର ଭିଡ଼ିଓ ତିଆରି କରିବା ସହ ଭାଇରାଲ୍ କରିବା ଘଟଣା ରାଜଧାନୀରେ ଆଲୋଡ଼ନ ସୃଷ୍ଟି କରିଛି। ମନ୍ଦିର ଭିତରେ ପୂଜକଙ୍କର ଏପରି କଳା କାରନାମାକୁ ତୀବ୍ର ନିନ୍ଦା ସହ ସମାଲୋଚନା କରାଯାଇଛି। ମେଘେଶ୍ବର ମନ୍ଦିର ପରିସରରେ ଘଟିଥିବା ଏହି ଘଟଣାରେ ବଡ଼ଗଡ଼ ଥାନା ପୁଲିସ ପୂଜକ ଗଙ୍ଗାଧର ରଥଙ୍କୁ ଗିରଫ କରିଫ କରିଛି। ଅନ୍ୟପକ୍ଷରେ ପୁଲିସ କାର୍ଯ୍ୟାନୁଷ୍ଠାନର ଦୁଇଦିନ ପୂର୍ବରୁ ଭିଡ଼ିଓ ଭାଇରାଲ୍ ହେବା ପରେ ମନ୍ଦିର ପରିଚାଳନା କମିଟି ପକ୍ଷରୁ ଗଙ୍ଗାଧରଙ୍କୁ ବିଦା କରାଯାଇଛି।
ମିଳିଥିବା ସୂଚନା ଅନୁସାରେ, ଅଭିଯୋଗକାରୀ ମହିଳାଙ୍କ ପରିବାର ଓ ଗଙ୍ଗାଧର କଳିଙ୍ଗ ବସ୍ତିରେ ରହନ୍ତି। ମହିଳାଙ୍କ ସହ ତାଙ୍କର ଗତ କିଛି ମାସ ହେଲା ବିବାଦ ରହିଥିଲା। ମହିଳାଙ୍କଠାରୁ ପ୍ରତିଶୋଧ ନେବା ପାଇଁ ଗଙ୍ଗାଧର ଏକ ବ୍ଲୁ-ପ୍ରିଣ୍ଟ ପ୍ରସ୍ତୁତ କରିଥିଲେ। ଗତ ୫ ତାରିଖରେ ମହିଳା ମନ୍ଦିରକୁ ଯାଇଥିଲେ। ଗଙ୍ଗାଧର ତାଙ୍କୁ ବେଢାର ଏକ କୋଣକୁ ନେଇ ସେଠାରେ ଅସଦାଚରଣ କରିଥିଲେ। ପୂର୍ବ ଯୋଜନା ଅନୁଯାୟୀ ନିକଟରେ ମୋବାଇଲ ଫୋନ୍ ଥୋଇ ଏହାକୁ ରେକର୍ଡିଂ କରିଥିଲେ। ଏହା ପରେ ଏହି ଭିଡିଓକୁ ଭାଇରାଲ୍ କରି ଦେଇଥିଲେ ବୋଲି ପୁଲିସ ପଚରାଉଚରା ସମୟରେ ଜାଣିବାକୁ ପାଇଛି। ମହିଳାଙ୍କ ଅଭିଯୋଗ ଆଧାରରେ ପୁଲିସ ଏକ ମାମଲା ରୁଜୁ କରି ତାଙ୍କୁ କୋର୍ଟଚାଲାଣ କରିଛି।
ଭିଡିଓ ଭାଇରାଲ୍ ହେବା ପରେ ପୂଜକଙ୍କର ଏଭଳି କାର୍ଯ୍ୟକୁ ନେଇ ଗତ ୬ ତାରିଖରେ ମନ୍ଦିର ପରିଚାଳନା କମିଟିର ଜରୁରି ବୈଠକ ଡକାଯାଇଥିଲା। ଗଙ୍ଗାଧରଙ୍କୁ ବିଦା କରାଯିବା ସହ ମନ୍ଦିର ସେବା ଓ ପୂଜା ସଂକ୍ରାନ୍ତୀୟ କୌଣସି ବ୍ୟକ୍ତି ତାଙ୍କ ସହ ଯୋଗାଯୋଗ ନ କରିବା ପାଇଁ କୁହାଯାଇଛି। ଯଦି କେହି ତାଙ୍କ ସହ ଯୋଗାଯୋଗ କଲେ, ଏଥିପାଇଁ ମନ୍ଦିର କର୍ତ୍ତୃପକ୍ଷ ଦାୟୀ ରହିବେ ନାହିଁ ବୋଲି ପରିଚାଳନା କମିଟି ସଭାପତି ଅଶୋକ ସିଂ କହିଛନ୍ତି।
