ନରସିଂହପୁର ୨୭।୧୧: ମଧ୍ୟପ୍ରଦେଶ ନରସିଂହପୁର ଜିଲ୍ଲାରୁ ଏମିତି ଏକ ଖବର ସାମ୍ନାକୁ ଆସିଛି ଯାହା ଶୁଣିଲେ ଆପଣ ଆଶ୍ଚର୍ଯ୍ୟ ହୋଇଯିବେ । ପ୍ରାୟତଃ ଅଧିକାଂଶ ସମୟରେ ଦେଖିବାକୁ ମିଳେ ଯେ, ଶାଶୁ-ଶ୍ବଶୁର ନିଜ ବୋହୂଙ୍କୁ ନିର୍ଯାତନା ଦେଇଥାନ୍ତି । ମାତ୍ର ନରସିଂହପୁର ଜିଲ୍ଲାରେ ମୋଟେଗାଓଁ ତହସିଲ ଝୋତେଶ୍ବର ମବାଇ ନିବାସୀ ରବିଶଙ୍କର ସୋନି ସମାଜ ପାଇଁ ଏକ ନୂଆ ଉଦାହରଣ ସୃଷ୍ଟି କରିଛନ୍ତି । ଯାହା ଅଧିକାଂଶ ଫିଲ୍ମଗୁଡିକରେ ଦେଖିବାକୁ ମିଳିଥାଏ । ସେ ତାଙ୍କ ବିଧବା ବୋହୂଙ୍କୁ ଝିଅ ଭଳି ରଖି ସବୁ ରୀତିନୀତିରେ ପୁର୍ନବାର ବିବାହ କରାଇବାକୁ ନିଷ୍ପତ୍ତି ନେଇଛନ୍ତି । ଶ୍ବଶୁର ହେବା ସଙ୍ଗେ ସଙ୍ଗେ ବାପା ହୋଇ କନ୍ୟାଦାନ କରିବାକୁ ମଧ୍ୟ ନିଷ୍ପତ୍ତି ନେଇଛନ୍ତି । ଫିଲ୍ମର କାହାଣୀ ଭଳି ଲାଗୁଥିବା ଏହି ଘଟଣାକୁ ସତ କରି ଦେଖାଇଛନ୍ତି ସେନାର ଅବସରପ୍ରାପ୍ତ ଡେପୁଟୀ ରେଞ୍ଜର ରବିଶଙ୍କର ସୋନି ।
ସୂଚନା ଅନୁସାରେ ରବିଶଙ୍କର ସୋନିଙ୍କ ପୁଅ ସଞ୍ଜୟଙ୍କର ବିବାହ ୧୨ ବର୍ଷ ପୂର୍ବରୁ ୨୦୦୮ ମସିହାରେ କରେଲି ନିବାସୀ ରାମଜୀ ସୋନୀଙ୍କ ଝିଅ ସରିତାଙ୍କ ସହ ହୋଇଥିଲା । ଉଭୟଙ୍କର ୧୧ ଏବଂ ୯ ବର୍ଷର ଦୁଇ ଝିଅ ଅଛନ୍ତି । ଗତ ସେପ୍ଟେମ୍ବର ୨୫ ତାରିଖରେ ପୁଅ ସଞ୍ଜୟଙ୍କର ରୋଗଗ୍ରସ୍ତ ହେବା କାରଣରୁ ମୃତ୍ୟୁ ହୋଇଥିଲା । ଫଳରେ ବୋହୂ ଏବଂ ନାତୁଣୀଙ୍କୁ ପୁଣି ଥରେ ବଞ୍ଚିବାର ସାହାରା ଦେବାକୁ ରବିଶଙ୍କର ନିଷ୍ପତ୍ତି ନେଇଥିଲେ । ସେ ବୋହୂଙ୍କ ବାପାଙ୍କୁ ଏ ସଂପର୍କରେ ଜଣାଇବା ସହ ପୁଅଟିଏ ଖୋଜିବା ପାଇଁ କହିଥିଲେ । ନିଜେ ମଧ୍ୟ ଭଲ ପୁଅଟିଏ ଖୋଜିବାରେ ଲାଗିପଡିଥିଲେ । ଶେଷରେ ଜବଲପୁର ପିପରିୟା ନିବାସୀ ରାଜେଶ ସୋନୀଙ୍କ ସହ ତାଙ୍କ ବୋହୂଙ୍କର ବିବାହ କରିବାକୁ ନିଷ୍ପତ୍ତି ନେଇଥିଲେ ।
ରାଜେଶଙ୍କର ପତ୍ନୀଙ୍କର ୩ ବର୍ଷ ପୂର୍ବେ ସଡକ ଦୁର୍ଘଟଣାରେ ଦେହାନ୍ତ ହୋଇଥିଲା । ତାଙ୍କର କୌଣସି ସନ୍ତାନ ନାହାନ୍ତି । ରାଜେଶଙ୍କ ପରିବାର ଲୋକ ମଧ୍ୟ ସରିତାଙ୍କୁ ବୋହୂ କରି ନେବା ପାଇଁ ରାଜି ହୋଇଯାଇଥିଲେ । ରବିଶଙ୍କର କହିଛନ୍ତି ଯେ, ସେ ତାଙ୍କ ପୁଅ ନାଁରେ କିଣିଥିବା କାର୍ କୁ ସେ ତାଙ୍କ ବୋହୂଙ୍କ ନାଁରେ କରିଦେଇଛନ୍ତି । ପୁଅର ମୃତ୍ୟୁ ପରେ ଯେଉଁ ବୀମା ରାଶି ୩୭୬୦୦୦ ଟଙ୍କା ମିଳିଥିଲା ତାକୁ ମଧ୍ୟ ବୋହୂ ନାଁରେ ଜମା କରିଦେଇଛନ୍ତି । ଏହାସହ ତାଙ୍କର ସବୁ ଗହଣା ମଧ୍ୟ ଦେଇଦେଇଛନ୍ତି ।
