ଇମ୍ଫାଲ: ମଙ୍ଗଳବାର ୨୦୦ ବନ୍ଧୁକଧାରୀ ଘରେ ପଶି ମଣିପୁର ପୁଲିସର ଜଣେ ବରିଷ୍ଠ ଅଧିକାରୀଙ୍କୁ ଅପହରଣ କରିନେଇଥିଲେ। ପୁଲିସ ଓ ସୁରକ୍ଷା ବାହିନୀର ତ୍ୱରିତ କାର୍ଯ୍ୟାନୁଷ୍ଠାନ ଫଳରେ କିଛି ଘଣ୍ଟା ମଧ୍ୟରେ ଅଧିକାରୀଙ୍କ ସୁରକ୍ଷିତ ପ୍ରତ୍ୟାବର୍ତ୍ତନ ସମ୍ଭବ ହୋଇଛି। ଇମ୍ଫାଲ ପଶ୍ଚିମର ଅତିରିକ୍ତ ଆରକ୍ଷୀ ଅଧୀକ୍ଷକ ମୋଇରାଙ୍ଗଥେମ୍ ଅମିତ ସିଂହଙ୍କୁ ଇମ୍ଫାଲ ପଶ୍ଚିମ ଜିଲ୍ଲାରେ ଥିବା ତାଙ୍କ ବାସଭବନରୁ ସଶସ୍ତ୍ର ଦୁର୍ବୃତ୍ତମାନେ ଅପହରଣ କରି ନେଇଥିଲେ।। ପୁଲିସ ବିବୃତିରେ କୁହାଯାଇଛି ଯେ ପ୍ରାୟ ୨୦୦ ସଶସ୍ତ୍ର ବ୍ୟକ୍ତି ଇମ୍ଫାଲ ପଶ୍ଚିମରେ ଥିବା ମୋଇରାଙ୍ଗଥେମ୍ଙ୍କ ବାସଭବନରେ ପଶି ଆଖିବୁଜା ଗୁଳି ଚଳାଇବା ସହ ଜିନିଷପତ୍ର ଭଙ୍ଗାରୁଜା କରିଥିଲେ। ଏହି ଘଟଣା ଜଣାପଡ଼ିବା ପରେ ସୁରକ୍ଷା ବାହିନୀକୁ ଡକାଯାଇଥିଲା। ଏହି ଘଟଣାରେ ରବିନାଶ ମୋଇରାଙ୍ଗଥେମ ଓ କାଙ୍ଗୁଜାମ ଭୀମସେନ ନାମକ ଦୁଇ ଜଣ ଆହତ ହୋଇ ଡାକ୍ତରଖାନାରେ ଭର୍ତ୍ତି ହୋଇଛନ୍ତି। ତେବେ ବିଶୃଙ୍ଖଳା ଭିତରେ ଦୁର୍ବୃତ୍ତମାନେ ମୋଇରାଙ୍ଗଥେମ୍ ଓ ତାଙ୍କର ଜଣେ ସୁରକ୍ଷାକର୍ମୀଙ୍କୁ ଅପହରଣ କରି ନେଇଥିଲେ। ଉଦ୍ଧାର କାର୍ଯ୍ୟ ପାଇଁ ତୁରନ୍ତ ଅଧିକ ଫୋର୍ସ ମୁତୟନ କରାଯାଇଥିଲା। ମାତ୍ର କିଛି ଘଣ୍ଟା ମଧ୍ୟରେ ଅପହୃତ ଅତିରିକ୍ତ ଏସ୍ପି ଓ ତାଙ୍କ ସୁରକ୍ଷାକର୍ମୀଙ୍କୁ କ୍ୱାକିଥେଲ କୋଞ୍ଜେଙ୍ଗ ଲେଇକାଇ ଅଞ୍ଚଳରୁ ଉଦ୍ଧାର କରାଯାଇଥିଲା। ଉଦ୍ଧାର ପରେ ସେମାନଙ୍କୁ ଚିକିତ୍ସା ପାଇଁ ରାଜ ମେଡିସିଟିକୁ ନିଆଯାଇଥିଲା। ଏ ନେଇ ଏକ ମାମଲା ରୁଜୁ କରାଯାଇ ଘଟଣାର ତଦନ୍ତ ଜାରି ରହିଛି।
ମଣିପୁର ପୁଲିସ ଅଧିକାରୀଙ୍କୁ ଘରୁ ଉଠାଇନେଲେ ୨୦୦ ବନ୍ଧୁକଧାରୀ, କିଛି ଘଣ୍ଟା ମଧ୍ୟରେ ଉଦ୍ଧାର
