ନୂଆଦିଲ୍ଲୀ: ଇସ୍ରାଏଲ-ଗାଜା ଯୁଦ୍ଧ ଥମିବାର ନାଁ ନେଉନାହିଁ। ଏହି ଯୁଦ୍ଧ ଯୋଗୁଁ ପୁଣି ଥରେ ଗାଜାରେ ମାନବିକ ସଙ୍କଟ ସୃଷ୍ଟି ହୋଇଛି। ଉତ୍ତର ଗାଜାରେ ଦୁର୍ଭିକ୍ଷ ଭଳି ପରିସ୍ଥିତି ସୃଷ୍ଟି ହୋଇଛି। ଗାଜାର ଲୋକମାନେ ଭୋକଉପାସରେ ଦିନ କାଟୁଛନ୍ତି। ଜାନୁଆରି ୨୩ ପରଠାରୁ ଉତ୍ତର ଗାଜାର ଲୋକଙ୍କ ପାଖରେ କୌଣସି ମାନବିକ ସହାୟତା ପହଞ୍ଚିନାହିଁ ବୋଲି ବିଶ୍ୱ ଖାଦ୍ୟ କାର୍ଯ୍ୟକ୍ରମ ମଙ୍ଗଳବାର ଚେତାବନୀ ଦେଇଛି। ଡବ୍ଲ୍ୟୁଏଫ୍ପିର ଉପନିର୍ବାହୀ ନିର୍ଦ୍ଦେଶକ କାର୍ଲ ସ୍କାଉ କହିଛନ୍ତି, ଯଦି କିଛି ପରିବର୍ତ୍ତନ ନ ହୁଏ, ତେବେ ଉତ୍ତର ଗାଜାରେ ଦୁର୍ଭିକ୍ଷ ଅତି ନିକଟତର। ଜାତିସଂଘ ମାନବବାଦୀ କାର୍ଯ୍ୟାଳୟ ଓସିଏଚ୍ଏର ରମେଶ ରାଜସିଂହମ୍ ‘ପ୍ରାୟ ଅନିବାର୍ଯ୍ୟ’ ଗଣ ଅନାହାର ବିଷୟରେ ଚେତାବନୀ ଦେଇଛନ୍ତି। ଗାଜାର ପ୍ରାୟ ୫,୭୬,୦୦୦ ଲୋକ ବା ଜନସଂଖ୍ୟାର ଏକ ଚତୁର୍ଥାଂଶ ଲୋକ ଦୁର୍ଭିକ୍ଷଠାରୁ ଗୋଟିଏ ପାଦ ଦୂରରେ ଅଛନ୍ତି। ଉତ୍ତର ଗାଜାରେ ଦୁଇ ବର୍ଷରୁ କମ୍ ବୟସର ଛଅ ଜଣ ଶିଶୁ ମଧ୍ୟରୁ ଜଣେ ତୀବ୍ର ପୁଷ୍ଟିହୀନତାର ଶିକାର ହେଉଛନ୍ତି। ମିଳିତ ଜାତିସଂଘର ଖାଦ୍ୟ ଓ କୃଷି ସଂଗଠନ (ଏଫ୍ଏଓ)ର ଉପମହାନିର୍ଦ୍ଦେଶକ ମୌରିଜିଓ ମାର୍ଟିନା ଚେତାବନୀ ଦେଇଛନ୍ତି ଯେ ଗାଜାରେ ପ୍ରାୟ ୯୭ ପ୍ରତିଶତ ଭୂତଳ ଜଳ ପିଇବାଯୋଗ୍ୟ ନୁହେଁ, ଯାହା ଫଳରେ କୃଷି ଉତ୍ପାଦନ ହ୍ରାସ ପାଇଛି। ଜାତିସଂଘ ମହାସଚିବ ଆଣ୍ଟୋନିଓ ଗୁଟେରେସଙ୍କ ମୁଖପାତ୍ର ମଙ୍ଗଳବାର କହିଛନ୍ତି ଯେ ସୀମାରେ ଗାଜା ଯିବା ପାଇଁ ସହାୟତା ପ୍ରସ୍ତୁତ ହୋଇ ଅପେକ୍ଷା କରିଛି।
