ବଡବିଲ ୨୮।୧୧: ଭାରସାମ୍ୟ ହରାଇ ୨୫ ଫୁଟ ତଳ ଖାଇକୁ ଖସିଲା ୧୪ ଚକିଆ ଟ୍ରକ୍ । ଦୁର୍ଘଟଣାରେ ଡ୍ରାଇଭରଙ୍କ ମୃତ୍ୟୁ ହୋଇଛି । ମୃତ ଡ୍ରାଇଭର ଘସିପୁରା ଥାନା ରେକୁଟିଆ ଅଞ୍ଚଳର ପ୍ରକାଶ ଜେନା ।
ବଡବିଲ ଥାନା ଠାକୁରାଣୀ, ଆର୍ସଲେର ମିତ୍ତଲ ଖଣି ନିକଟରେ ଏହି ଦୁର୍ଘଟଣା ଘଟିଛି । ଓଡି ୩୪ ଏମ୍ ୫୨୬୫ ନମ୍ବର ୧୪ ଚକିଆ ଟ୍ରକ୍ ମିତ୍ତଲ ଖଣିରୁ ଫାଇନ୍ସ ୨୯ ଟନରୁ ଅଧିକ (ଲୁହାପଥର ଗୁଣ୍ଡ) ବୋଝେଇ କରି ଭାଇଜାଗ୍ ଉଦ୍ଦେଶ୍ୟରେ ବାହାରିଥିଲେ । ତେବେ ମାଇନ୍ସରୁ ବାହାରି ପ୍ରାୟ ଶହେ ମିଟର ଯିବାପରେ ଟ୍ରକଟି ଭାରସାମ୍ୟ ହରାଇ ଏକ କ୍ୟାବିନକୁ ଧକ୍କା ଦେବା ସହ ପ୍ରାୟ ୨୫ ମିଟର ଖାଇକୁ ଖସିପଡିଥିଲା । ଗାଡି ଭାଙ୍ଗି ଚୁରମାର ହୋଇଯିବା ସହ ଚାପିହୋଇ ଡ୍ରାଇଭରର ଶୋଚନୀୟ ମୃତ୍ୟୁ ଘଟିଥିଲା । ବଡବିଲ ପୋଲିସ ମୃତଦେହକୁ ଜବତ କରି ବ୍ୟବଚ୍ଛେଦ ପାଇଁ ପଠାଇଛି ।
