କୋଲକାତା: ପଶ୍ଚିମବଙ୍ଗର କୋଲକାତା ଓ ହାୱଡାକୁ ସଂଯୋଗ କରୁଥିବା ଭାରତର ପ୍ରଥମ ଅଣ୍ଡର୍ୱାଟର ମେଟ୍ରୋ ମାର୍ଗ ସହ ମଙ୍ଗଳବାର ୧୫,୪୦୦ କୋଟି ଟଙ୍କାର ଅନ୍ୟାନ୍ୟ ଯୋଗାଯୋଗ ପ୍ରକଳ୍ପର ଉଦ୍ଘାଟନ କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ। ହାୱଡା ମୈଦାନରୁ ଏସପ୍ଲାନେଡ୍ ପର୍ଯ୍ୟନ୍ତ ପୂର୍ବ-ପଶ୍ଚିମ ମେଟ୍ରୋର ୪.୮ କିଲୋମିଟର ରାସ୍ତା ୪,୯୬୫ କୋଟି ଟଙ୍କା ବ୍ୟୟରେ ନିର୍ମିତ ହୋଇଛି। ଏହା ହେଉଛି ଭାରତର ସବୁଠାରୁ ଗଭୀର (୩୦ ମିଟର) ମେଟ୍ରୋ ଷ୍ଟେସନ। କୋଲକାତା ମେଟ୍ରୋ ପକ୍ଷରୁ ଜାରି ବିବୃତିରେ କୁହାଯାଇଛି ଯେ ଇ-ଡବ୍ଲ୍ୟୁ ମେଟ୍ରୋ କରିଡର ହୁଗୁଳି ନଦୀ ତଳେ ଭାରତରେ ପ୍ରଥମ ଅଣ୍ଡର ରିଭର ଟ୍ରାନ୍ସପୋର୍ଟ ଟନେଲ ହେବାର ଗୌରବ ଅର୍ଜନ କରିଛି, ଯାହାର ଲମ୍ବ ୫୨୦ ମିଟର। ଏହାର ଗଭୀରତା ନଦୀ ପତ୍ତନଠାରୁ ୧୩ ମିଟର ଏବଂ ହାୱଡାଠାରେ ସବୁଠାରୁ ଅଧିକ ୩୦ ମିଟର। ପ୍ରଧାନମନ୍ତ୍ରୀ ଆଜି ଅଣ୍ଡରୱାଟର ମେଟ୍ରୋରେ ଯାତ୍ରା କରିବା ସହ ଛାତ୍ରମାନଙ୍କ ସହ ମତ ବିନିମୟ କରିଥିଲେ।
କୋଲକାତା: କୋଲକାତାରେ ଆଜି ଉଦ୍ାଘାଟିତ ହୋଇଥିବା ଦେଶର ପ୍ରଥମ ଅଣ୍ଡରୱାଟର ‘ହାୱଡା ମୈଦାନ-ଏସପ୍ଲାନେଡ୍ ମେଟ୍ରୋ’ ପ୍ରକଳ୍ପ ଏବେ ସମସ୍ତଙ୍କ ଧ୍ୟାନ ଆକର୍ଷଣ କରିଛି। ନୂଆ ଅଣ୍ଡରୱାଟର ମେଟ୍ରୋ ବିଷୟରେ ୫ଟି ଜ୍ଞାତବ୍ୟ ତଥ୍ୟ:
କୋଲକାତାର ନୂଆ ଅଣ୍ଡରୱାଟର ମେଟ୍ରୋର ବୈର୍ଘ୍ୟ ୧୬.୬ କିଲୋମିଟର। ହାଓଡ଼ା ମୈଦାନରୁ ଫୁଲବାଗାନ ପର୍ଯ୍ୟନ୍ତ ମାଟିତଳେ ପ୍ରାୟ ୧୦.୮ କିଲୋମିଟର ସୁଡ଼ଙ୍ଗ ଯାଇଛି। ତା’ ଭିତରେ ହୁଗୁଳି ନଦୀ ତଳେ ରହିଛି ଦେଶର ସବୁଠାରୁ ଗଭୀର ସୁଡ଼ଙ୍ଗ। ଏହାର ଗଭୀରତା ୩୦ ମିଟର। ବାକି ସବୁ ମାଟି ଉପରକୁ ରହିଛି।
୪.୮ କିଲୋମିଟର ପର୍ଯ୍ୟନ୍ତ ବ୍ୟାପିଥିବା ଗୋଟିଏ ସେକ୍ସନ ହାଓଡ଼ା ଓ ସଲ୍ଟଲେକ୍କୁ ସଂଯୋଗ କରୁଛି, ଯାହା ଏହି ଦୁଇ ସହର ମଧ୍ୟରେ ଏକ ଗୁରୁତ୍ୱପୂର୍ଣ୍ଣ ସଂଯୋଗ ପ୍ରଦାନ କରୁଛି।
ଅଣ୍ଡର୍ୱାଟର ମେଟ୍ରୋରେ ୬ଟି ଷ୍ଟେସନ ରହିଛି, ସେଥିମଧ୍ୟରୁ ୩ଟି ଭୂତଳରେ ରହିଛି।
ଏହି ମେଟ୍ରୋ ମାତ୍ର ୪୫ ସେକେଣ୍ଡରେ ୫୨୦ ମିଟର ନଦୀ ଅଞ୍ଚଳକୁ ଅତିକ୍ରମ କରିଥାଏ, ଯାହା ଦ୍ରୁତ ଏବଂ ଦକ୍ଷ ପରିବହନ ବ୍ୟବସ୍ଥାର ପ୍ରତିଶ୍ରୁତି ଦେଇଥାଏ।
ଟ୍ରେନ୍ ଅଟୋମେଟିକ୍ ଟ୍ରେନ୍ ଅପରେସନ୍ (ଏଟିଓ) ବ୍ୟବହାର କରେ। ଏହା ଏକ ଅତ୍ୟାଧୁନିକ ବ୍ୟବସ୍ଥା ଯେଉଁଠାରେ ମୋଟରମ୍ୟାନ୍ ଏକ ବଟନ୍ ଦବାଇଲେ ଟ୍ରେନ୍ ପରବର୍ତ୍ତୀ ଷ୍ଟେସନକୁ ଅଗ୍ରସର ହୁଏ।
ପ୍ରଥମ ଦୁଇ କିଲୋମିଟର ପାଇଁ ଅଣ୍ଡର ୱାଟର ମେଟ୍ରୋ ଲାଗି ଟିକେଟ ମୂଲ୍ୟ ମାତ୍ର ୫ ଟଙ୍କାରୁ ଆରମ୍ଭ ହୋଇଥାଏ। ତା’ପରେ ଏହା ୫ ଟଙ୍କା, ୧୦ ଟଙ୍କା, ୧୫ ଟଙ୍କା, ୨୦ ଟଙ୍କା, ୨୫ ଟଙ୍କା ଇତ୍ୟାଦି ସହଜ ସ୍ତରରେ ବୃଦ୍ଧି ପାଇ ସର୍ବାଧିକ ୫୦ ଟଙ୍କାରେ ପହଞ୍ଚିଥାଏ।
ଏସ୍ପ୍ଲାନେଡ୍ ଏବଂ ସିଆଲଦା ମଧ୍ୟରେ ଥିବା ଅଂଶ ଏବେ ବି ନିର୍ମାଣାଧୀନ ଥିବା ବେଳେ ସଲ୍ଟଲେକ୍ ସେକ୍ଟର-୫ରୁ ସିଆଲଦା ପର୍ଯ୍ୟନ୍ତ କାର୍ଯ୍ୟକ୍ଷମ ହୋଇ ସାରିଛି। କୋଲକାତା ମେଟ୍ରୋ ଆସନ୍ତା ଜୁନ୍ କିମ୍ବା ଜୁଲାଇ ମାସରେ ସଲ୍ଟଲେକ୍ ସେକ୍ଟର ୫ ଏବଂ ହାୱଡା ମୈଦାନ ମଧ୍ୟରେ ସମ୍ପୂର୍ଣ୍ଣ ପୂର୍ବ-ପଶ୍ଚିମ ମାର୍ଗ ଆରମ୍ଭ କରିବାକୁ ଯୋଜନା କରିଛି। ଏପ୍ରିଲ ୨୦୨୩ରେ କୋଲକାତା ମେଟ୍ରୋ ହୁଗୁଳି ନଦୀ ତଳ ସୁଡ଼ଙ୍ଗ ଦେଇ ସଫଳତାର ସହ ଟ୍ରେନ୍ ଚଳାଚଳ କରି ଇତିହାସ ରଚିଥିଲା।