ଖଲ୍ଲିକୋଟ, ୧୬/୧୧: ଖଲ୍ଲିକୋଟ ଥାନା ଅନ୍ତର୍ଗତ କେଶପୁର ଷ୍ଟେଟ ବ୍ୟାଙ୍କ ନିକଟରେ ଗତକାଲି ଦିନ ଦ୍ବିପ୍ରହରରେ ଲୁଟ୍ ହୋଇଛି । କିଛି ଦୁର୍ବୃତ୍ତ ବାଇକରେ ଆସି ଜଣେ ମହିଳାଙ୍କ ଠାରୁ ଟଙ୍କା ଝାମ୍ପି ନେଇଥିବା ଜଣାପଡ଼ିଛି । ଏହି ସମୟର ଏକ ଭିଡିଓ ଏବେ ଭାଇରଲ ହେବାରେ ଲାଗିଛି ।
ମୋହନପୁର ଗ୍ରାମର ପୁଷ୍ପା ପଲେଇ ବ୍ୟାଙ୍କକୁ ଗୋଲ୍ଡ ଲୋନ ଟଙ୍କା ଡିପୋଜିଟ କରିବାକୁ ଯାଉଥିବା ବେଳେ ତାଙ୍କ ଠାରୁ ଲୁଟ ହୋଇଛି । ମହିଳା ଜଣକ କେଶପୁର ସ୍ଥିତ ଷ୍ଟେଟ ବ୍ୟାଙ୍କକୁ ଗୋଲ୍ଡ ଲୋନ ଟଙ୍କା ଡିପୋଜିଟ କରିବାକୁ ଯାଇଥିଲେ । ହଠାତ ଷ୍ଟେଟ ବ୍ୟାଙ୍କ ନିକଟରେ ଏକ ବ୍ଲ୍ୟୁ କଲର ଟିଭିଏସ ଆପାଚି ବାଇକରେ ଦୁଇ ଜଣ ଦୁର୍ବୃତ୍ତ ଆସି ମହିଳା ହାତରେ ଧରିଥିବା ବ୍ୟାଗକୁ ଝାମ୍ପି ନେଇଯାଇଥିଲେ । ବ୍ୟାଗକୁ ଟାଣି ନେବା ସମୟରେ ମହିଳା ଜଣଙ୍କ ତଳେ ପଡି ଯାଇଥିଲେ ।
ଯାହା ଫଳରେ ତାଙ୍କ ହାତ ଓ ଗୋଡ଼ରେ ଆଘାତ ଲାଗିଥିବା ବେଳେ ବ୍ୟାଗ ଭିତରେ ୧୫ ହଜାର ଟଙ୍କା ସହ ପ୍ୟାନ କାର୍ଡ, ବ୍ୟାଙ୍କ ପାସବୁକ, ଆଧାରକାର୍ଡ, ମୋବାଇଲ ଫୋନ ଓ ବିଭିନ୍ନ ଦରକାରୀ କାଗଜପତ୍ର ଥିବା ମହିଳା ଜଣକ କହିଛନ୍ତି । ଅନ୍ୟପଟେ ଖବର ପାଇ ଖଲ୍ଲିକୋଟ ପୋଲିସ କର୍ମଚାରୀ ମାନେ ଘଟଣା ସ୍ଥଳରେ ପହଞ୍ଚି ଛାନଭିନ ଆରମ୍ଭ କରିଥିବା ବେଳେ ନିକଟରେ ଥିବା ସିସିଟିଭି ଫୁଟେଜକୁ ଆଧାର କରି ପୋଲିସ ତଦନ୍ତ ପ୍ରକ୍ରିୟାକୁ ଜୋରଦାର କରିଥିବା ଜଣାପଡ଼ିଛି ।
