ମୁମ୍ବାଇ, ୦୯/୦୪: ଆଇପିଏଲରେ ଗୁଜୁରାଟ ଟାଇଟନ୍ସର ଦମଦାର୍ ପ୍ରଦର୍ଶନ ଜାରି ରହିଛି । ଦଳ ଶୁକ୍ରବାର ପଞ୍ଜାବ କିଙ୍ଗସକୁ ୬ ଓ୍ୱିକେଟରେ ମାତ୍ ଦେଇଥିଲା । ଉଭୟ ଦଳ ମଧ୍ୟରେ ଖେଳାଯାଇଥିବା ମୁକାବିଲା ଖୁବ୍ ରୋମାଞ୍ଚକର ହୋଇଥିଲା । କାରଣ ଶେଷ ଓଭରର ପ୍ରଥମ ବଲରେ ହାର୍ଦ୍ଦିକ ପାଣ୍ଡ୍ୟା ରନ୍ ଆଉଟ୍ ହୋଇଥିଲେ । ଫଳରେ ଗୁଜୁରାଟର ବିଜୟ କଷ୍ଟକର ହୋଇ ପଡିଥିଲା ।କିନ୍ତୁ ରାହୁଲ ତେଓ୍ୱାତିଆଙ୍କ ଛକା ଟାଇଟନ୍ସକୁ ଦେଇଥିବା ବିଜୟ ଉପହାର ।
ରନ୍ ଆଉଟ୍ ହେଲା ପରେ ରାଗିଗଲେ ହାର୍ଦ୍ଦିକ
ମ୍ୟାଚର ଶେଷ ଓଭରରେ ବୋଲିଂ କରୁଥିଲେ ଓଡିୟନ ସ୍ମିଥ୍ । ଷ୍ଟ୍ରାଇକରେ ଥିଲେ ଡେଭିଡ୍ ମିଲର୍ । ଓଭରର ପ୍ରଥମ ବଲରେ ବିଟ୍ ହୋଇଥିଲେ ମିଲର୍ । କିନ୍ତୁ ଷ୍ଟ୍ରାଇକ୍ ବଦଳାଇବା ପାଇଁ ରନ୍ ନେଇଥିଲେ । ଏହାମଧ୍ୟରେ ଓ୍ୱିକେଟ୍ କିପର ଜନୀ ବେୟରଷ୍ଟୋ ଓ୍ୱିକେଟ୍ ପଛରୁ ଥ୍ରୋ କରିଥିଲେ । ବଲ ଷ୍ଟମ୍ପରେ ବାଜିଥିଲା । ସେତେବେଳେ ହାର୍ଦ୍ଦିକ ଷ୍ଟ୍ରାଇକର ଏଣ୍ଡରେ ପହଁଚି ନଥିଲେ । ଫଳରେ ସେ ଆଉଟ୍ ହୋଇଯାଇଥିଲେ ।
ଆଉଟ୍ ହେଲା ପରେ ପାଣ୍ଡ୍ୟା ସାଥି ଖେଳାଳି ମିଲରଙ୍କ ଉପରେ ରାଗି ଯାଇଥିଲେ । ତେବେ ରନ୍ ନେବା ପାଇଁ ହାର୍ଦ୍ଦିକ ହିଁ କହିଥିଲେ । ଡେଭିଡ୍ ମିଲରମଧ୍ୟ ହାର୍ଦ୍ଦିକଙ୍କ ପ୍ରତିକ୍ରିୟା ଦେଖି ଚକିତ ହୋଇଯାଇଥିଲେ । ସୋସିଆଲ ମିଡିଆରେ ଏ ଘଟଣାର ଭିଜିଓ ଖୁବ୍ ଭାଇରାଲ ହେଉଛି ।
