କେନ୍ଦ୍ରାପଡା୨/୧: ଆସନ୍ତାକାଲି ଖୋଲିବ ତୁଳସୀ କ୍ଷେତ୍ର କେନ୍ଦ୍ରାପଡାର ଆରାଧ୍ୟ ଦେବତା ପ୍ରଭୁ ଶ୍ରୀ ବଳଦେବୀ ଜୀଉଁଙ୍କ ମନ୍ଦିର। ଏଥିପାଇଁ ଆଜି ମନ୍ଦିର ଟ୍ରଷ୍ଟବୋର୍ଡର ଏକ ଗରୁତ୍ବପୂର୍ଣ୍ଣ ବୈଠକ ଅନୁଷ୍ଠିତ ହୋଇଯାଇଛି। ବୈଠକରେ ନିଆଯାଇଥିବା ନିଷ୍ପତ୍ତି ଅନୁଯାୟୀ ମନ୍ଦିର ଭିତରକୁ ଏକ ସମୟରେ ଶହେ ଶ୍ରଦ୍ଧାଳୁ ଧାଡିରେ ପ୍ରବେଶ କରିବେ।
ଏହି ଧାଡି ଜଗମୋହନ ପର୍ଯ୍ୟନ୍ତ ରହିବ। ଜଗମୋହନ ମଧ୍ୟରେ ଗୋଲାକାର ବୃତ୍ତ ମଧ୍ୟରେ ସାମାଜିକ ଦୂରତା ଅବଲମ୍ବନ କରି ଶ୍ରଦ୍ଧାଳୁମାନେ ଶ୍ରୀଜୀଉମାନଙ୍କ ଦର୍ଶନ କରି ପାରିବେ। ତେବେ ଅରୁଣ ସ୍ତମ୍ଭ ନିକଟରେ ଏବଂ ବାଟ ଦେଉଳ ପୂର୍ବରୁ ସେନସର୍ ବେସ୍ଡ ସାନିଟାଇଜର୍ ରହିବ। ଏଇଠାରେ ମୁନସିପାଲିଟି କର୍ମଚାରୀମାନେ ରହି ମନ୍ଦିର ଭିତରକୁ ପ୍ରବେଶ କରୁଥିବା ଶ୍ରଦ୍ଧାଳୁମାନଙ୍କର ସ୍କ୍ରିନିଙ୍ଗ୍ କରିବେ।
ସେହିପରି ସେବାୟତମାନଙ୍କ ପାଇଁ ମଧ୍ୟ ମାସ୍କ ଓ ନିୟମିତ ବ୍ୟବଧାନରେ ସାନିଟାଇଜର ବ୍ୟବହାର ବାଧ୍ୟତାମୂଳକ କରାଯାଇଛି। କେନ୍ଦ୍ରାପଡା ଉପଜିଲ୍ଲାପାଳ ତଥା ମନ୍ଦିର ଟ୍ରଷ୍ଟବୋର୍ଡର ସଭାପତି ଜ୍ୟୋତି ଶଙ୍କର ମହାପାତ୍ରଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ ସେବାୟତ ପ୍ରତିନିଧି, ଟ୍ରଷ୍ଟବୋର୍ଡର ଅନ୍ୟ ସଦସ୍ୟମାନେ ଏହି ବୈଠକରେ ଉପସ୍ଥିତ ଥିଲେ।
