ଭୁବନେଶ୍ବର: ରାଜ୍ୟ ସରକାର ମାର୍ଚ୍ଚ ମାସ ପାଇଁ କରୋନା ଗାଇଡ଼ଲାଇନ୍ ଜାରି କରିଛନ୍ତି। ପୂର୍ବଭଳି ବାହାଘର ଓ ଅନ୍ତିମ ସଂସ୍କାରରେ ସର୍ବାଧିକ ୫୦୦ ଜଣ ସାମିଲ ହୋଇପାରିବେ। ବାହାଘର ଓ ଶୁଦ୍ଧିକ୍ରିୟାରେ କରୋନା ଗାଇଡ଼ଲାଇନ୍ ପାଳନ ହେଉଛି କି ନାହିଁ ତାହା ଆୟୋଜକ ଯାଞ୍ଚ କରିବେ। ଯେଉଁମାନେ ମାସ୍କ ପିନ୍ଧି ନ ଥିବେ, ଆୟୋଜକ ସେମାନଙ୍କୁ ମାସ୍କ ଯୋଗେଇ ଦେବେ। ସେହିପରି ସବୁ ପ୍ରବେଶ ପଥରେ ରହି ଅତିଥିମାନେ ମାସ୍କ ପରିଧାନ କରିଛନ୍ତି କି ନାହିଁ ତାହା ଆୟୋଜକ ଯାଞ୍ଚ କରିବେ।
ସେହିପରି ଅବରୋଧ ଅଞ୍ଚଳ ବାହାରେ ସାମାଜିକ, ଧାର୍ମିକ, ରାଜନୈତିକ, କ୍ରୀଡ଼ା, ମନୋରଂଜନ, ସାଂସ୍କୃତିକ କାର୍ଯ୍ୟକ୍ରମର ଆୟୋଜନ ହୋଇପାରିବ। କିନ୍ତୁ ଏସବୁ ସମାବେଶରେ ଗୋଟିଏ ସ୍ଥାନରେ ୫୦୦ରୁ ଅଧିକ ଲୋକ ଏକତ୍ର ହୋଇପାରିବେ ନାହିଁ। ସମାରୋହରେ ମାସ୍କ ପିନ୍ଧିବା ଓ ସାମାଜିକ ଦୂରତାକୁ ଗୁରୁତ୍ବ ଦିଆଯିବ। ସେହିପରି ଥର୍ମାଲ ସ୍କ୍ରିନିଂ ଓ ସାନିଟାଇଜର ବ୍ୟବହାରକୁ ବାଧ୍ୟତାମୂଳକ କରାଯିବ।
ରାଜ୍ୟ ସରକାରଙ୍କ ମାର୍ଚ୍ଚ ମାସର ଗାଇଡଲାଇନ ଅନୁସାରେ କୌଣସି ସ୍ଥାନରେ ସଂକ୍ରମଣ ବଢ଼ିଲେ ଅବରୋଧ ଅଞ୍ଚଳ ଭାବେ ଘୋଷଣା ହୋଇପାରିବ। ତେଣୁ ଉପରୋକ୍ତ ନିୟମକୁ କଡ଼ାକଡ଼ି ଭାବେ ପାଳନ କରିବାକୁ କୁହାଯାଉଛି।
