ନୂଆଦିଲ୍ଲୀ ୨୦/୦୫: ବଲିଉଡ ଅଭିନେତ୍ରୀ ସୋନାଲି କୁଲକର୍ଣ୍ଣି ଗତକାଲି ତାଙ୍କର ୩୩ ତମ ଜନ୍ମଦିନ ପାଳନ କରିଛନ୍ତି। ଏହି ବିଶେଷ ଅବସରରେ ଅଭିନେତ୍ରୀ ତାଙ୍କ ବିବାହର ଖୁସି ଖବର ଫ୍ୟାନ୍ସମାନଙ୍କ ସହ ସେୟାର କରିଛନ୍ତି। ଅଭିନେତ୍ରୀ ଫ୍ୟାନ୍ସମାନଙ୍କୁ କହିଛନ୍ତି ଯେ ସେ କୁନାଲ ବେନୋଡେକରଙ୍କୁ ବିବାହ କରୁଛନ୍ତି। ଏହା ପରେ ଫ୍ୟାନ୍ସମାନେ ତାଙ୍କୁ ଅଭିନନ୍ଦନ ଜଣାଇଛନ୍ତି।
ସୋନାଲି ତାଙ୍କ ଇନଷ୍ଟାଗ୍ରାମ ଆକାଉଣ୍ଟରେ ବିବାହ ଫଟୋ ମଧ୍ୟ ସେୟାର କରିଛନ୍ତି। ଏହି ଅଭିନେତ୍ରୀ ଦୁବାଇରେ ଅତି ସରଳ ଭାବରେ ବିବାହ କରିଛନ୍ତି । ସୋନାଲି ଧୁମଧାମରେ ବିବାହ କରିବାକୁ ଚାହୁଁଥିଲେ, କିନ୍ତୁ କରୋନାର ଦ୍ୱିତୀୟ ଲହର ହେତୁ ଏହି ଦମ୍ପତି ଶୀଘ୍ର ବିବାହ କରିବାକୁ ନିଷ୍ପତ୍ତି ନେଇଥିଲେ ଏବଂ ମେ ୭ ରେ ବିବାହ କରିଥିଲେ।
ବିବାହ ଫଟୋ ସେୟାର କରି ସୋନାଲି କହିଛନ୍ତି, ‘ଆମେ ଜୁନ୍ ମାସରେ ବ୍ରିଟେନରେ ବିବାହ କରିବାକୁ ଯାଉଥିଲୁ କିନ୍ତୁ କରୋନା ଭାଇରସ ହେତୁ ଆମେ ବିବାହକୁ ସ୍ଥଗିତ ରଖିଥିଲୁ। ସୁଟିଂ ଶେଷ କରିବା ପରେ, ମୁଁ ଦୁବାଇକୁ ବିବାହ ପ୍ରସ୍ତୁତି ଦେଖିବା ପାଇଁ ଆସିଥିଲି, ସେତେବେଳେ କରୋନାର ଦ୍ୱିତୀୟ ଲହର ଭାରତକୁ ଆସିଗଲା । ମୁଁ ଦୁବାଇରେ ଲକଡାଉନରେ ଫସି ଗଲି । ଏପ୍ରିଲରେ, କୋଭିଡ କାରଣରୁ ବ୍ରିଟେନ ଭାରତରୁ ଆସୁଥିବା ଲୋକଙ୍କୁ ବାରଣ କରିଥିଲା।‘
ଅଭିନେତ୍ରୀ ଆହୁରି ମଧ୍ୟ କହିଛନ୍ତି, ‘ଯାତ୍ରା ଉପରେ ପ୍ରତିବନ୍ଧକ ଏବଂ ପରିବାରର ବିପଦକୁ ଦୃଷ୍ଟିରେ ରଖି ଆମେ ଦୁହେଁ ଆମର ବିବାହ ସେଲିବ୍ରେସନକୁ ବାତିଲ କରିବାକୁ ନିଷ୍ପତ୍ତି ନେଇଛୁ। ଆମେ ଭାବୁଥିଲୁ ବର୍ତ୍ତମାନ ଆମେ ଗୋଟିଏ ଦେଶରେ ଅଛୁ, ତେବେ ଆମେ ମେ ମାସରେ ବିବାହ କରିନେବା ।‘
