ଦଶରଥପୁର: ଯାଜପୁର ଜିଲ୍ଲା ଦଶରଥପୁର ବ୍ଲକ୍ ମଙ୍ଗଳପୁର ଥାନା ଅନ୍ତର୍ଗତ କମାରଡ଼ିହି ପଞ୍ଚାୟତ ଇଟ୍ଟାପଡା ଗ୍ରାମରେ ବିଦ୍ୟୁତ୍ ଆଘାତରେ ସ୍ବର୍ଗତ ବିଶ୍ୱନାଥ ବାରିକଙ୍କ ସ୍ତ୍ରୀ ଲକ୍ଷ୍ମୀ ବାରିକ (୬୬)ଙ୍କ ମୃତ୍ୟୁ ଘଟିଛି। ଏଥିନେଇ ନାତି ସୁଜିତ କୁମାର ବାରିକ ଟାଟା କମ୍ପାନୀ ନାମରେ ଥାନାରେ ଅଭିଯୋଗ କରିଛନ୍ତି। ଅଭିଯୋଗ ପରେ ପୁଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି।
ଘଟଣାରୁ ପ୍ରକାଶ ଆଜି ସକାଳ ୫ଟା ସମୟରେ ପରିବାର ଲୋକେ ଉଠି ଦେଖିବାକୁ ପାଇଥିଲେ କି ଘର ସମ୍ମୁଖରେ ଥିବା ଏଲଟି ତାର ଛିଡ଼ି ପଡ଼ିଥିବାବେଳେ ସେଥିରେ ଲକ୍ଷ୍ମୀ ଲାଗି ରହିଛନ୍ତି। ସ୍ଥାନୀୟ ପଡ଼ୋଶୀଙ୍କୁ ଡାକି ବିଦ୍ୟୁତ୍ ତାରରୁ ସଂଯୋଗ ବିଛିନ୍ନ କରିବାବେଳକୁ ଲକ୍ଷ୍ମୀଙ୍କ ମୃତ୍ୟୁ ହୋଇଯାଇଥିଲା। ଏଥିନେଇ ବିଭାଗୀୟ ଜେଇ ଓ ଏସଡିଓଙ୍କୁ ଅବଗତ କରାଯାଇଥିଲା।
ସୂଚନାଥାଉକି ଗ୍ରାମ ମଝିରେ ଯାଇଥିବା ଏଲଟି ତାରଟି ଦୁର୍ବଳ ଥିବାରୁ ଏଭଳି ଅଘଟଣ ଘଟିଛି। ଏଣୁ ଏଥିପାଇଁ ଟାଟା ବିଭାଗକୁ ପୂର୍ବରୁ ଅଭିଯୋଗ କରାଯାଇଥିବାବେଳେ କମ୍ପାନି ମରାମତି କରିନଥିଲା। ଏହି ମୃତ୍ୟୁ ପାଇଁ ଟାଟା କମ୍ପାନିକୁ ଦାୟୀ କରିଛନ୍ତି ସ୍ଥାନୀୟ ଲୋକେ।
