କେନ୍ଦୁଝର : କେନ୍ଦୁଝରର ପୂର୍ବତନ ବିଜେଡି ବିଧାୟକ ସୁବର୍ଣ୍ଣ ନାୟକ ବିଜେପିରେ ମିଶିବେ। ଶ୍ରୀ ନାୟକ ଶୁକ୍ରବାର ଦିନ ରାଜ୍ୟ କାର୍ଯ୍ୟାଳୟରେ ବିଜେପି ସଭାପତି ମନମୋହନ ସାମଲଙ୍କୁ ଭେଟିବା ପରେ ଏଭଳି ଚର୍ଚ୍ଚା ଜୋର ଧରିଛି। ୨୦୦୯ରେ ବିଜେଡି ଟିକେଟର ଶ୍ରୀ ନାୟକ କେନ୍ଦୁଝର ଆସନରୁ ବିଜୟୀ ହୋଇଥିଲେ। ପରେ ଚିଟ୍ଫଣ୍ଡ ମାମଲାରେ ସେ ଛନ୍ଦି ହୋଇଥିଲେ। ଏହାପରେ ଦଳ ତାଙ୍କୁ ୨୦୧୪ ଏବଂ ୨୦୧୯ ନିର୍ବାଚନରେ ଟିକେଟ ଦେଇନଥିଲା। ୨୦୧୯ରେ ସ୍ବାଧୀନ ଭାବେ ନିର୍ବାଚନ ଲଢ଼ି ପ୍ରାୟ ୪ ହଜାର ଭୋଟ ପାଇଥିଲେ।
ସେ ବିଜେଡିରେ ଅଛନ୍ତି ବୋଲି କହୁଥିଲେ ମଧ୍ୟ ଦଳର କୌଣସି କାର୍ଯ୍ୟକ୍ରମରେ ତାଙ୍କୁ ଦେଖିବାକୁ ମିଳୁ ନଥିଲା କି ତାଙ୍କୁ ଖୋଜା ପଡ଼ୁ ନଥିଲା। କିଛିଦିନ ହେବ ଶ୍ରୀ ନାୟକ ବିଜେପି ନେତାଙ୍କ ଯୋଗାଯୋଗରେ ଥିବାବେଳେ ଆଜି ହଠାତ୍ ବିଜେପି ରାଜ୍ୟ କାର୍ଯ୍ୟାଳୟରେ ଜିଲ୍ଲା ବିଜେପିର ବରିଷ୍ଠ ନେତା ଭଗବାନ ସାହୁ, ମହେଶ୍ବର ସାହୁଙ୍କ ସହ ରାଜ୍ୟ ବିଜେପି ସଭାପତି ମନମୋହନ ସାମଲଙ୍କ ପାଖରେ ଥିବାର ଫଟୋ ସାମାଜିକ ଗଣମାଧ୍ୟମରେ ଭାଇରାଲ ହୋଇଛି। ଏ ସମ୍ପର୍କରେ ତାଙ୍କର ପ୍ରତିକ୍ରିୟା ନେବାକୁ ଉଦ୍ୟମ କରାଯାଇଥିଲେ ମଧ୍ୟ ସେ ଫୋନ୍ ଉଠାଇ ନଥିଲେ।
