ନୂଆଦିଲ୍ଲୀ ୨୫/୦୭: ବିହାରର ସାରଣ ଜିଲ୍ଲା ଅନ୍ତର୍ଗତ ଛାପ୍ରାସ୍ଥିତ ଖୋଦାଇବାଗ ଅଞ୍ଚଳରେ ଏକ ଘରେ ରବିବାର ଜୋରଦାର ବିସ୍ଫୋରଣ ହୋଇଛି । ଫଳରେ ଘରର ଛାତ ଉଡ଼ିଯାଇଛି । ୬ ଜଣ ଲୋକ ଘଟଣାସ୍ଥଳରେ ପ୍ରାଣ ହରାଇଛନ୍ତି । ପ୍ରାୟ ୮ ଲୋକ ଆହତ ହୋଇଛନ୍ତି ।
ବିସ୍ଫୋରଣରେ ଉକ୍ତ ୩ ମହଲାବିଶିଷ୍ଟ ଘର ଭୁଶୁଡ଼ି ପଡ଼ିବାରୁ ଭଗ୍ନାବଶେଷ ତଳେ ଅନେକ ଲୋକ ରହିଯାଇଥିଲେ । ସେମାନଙ୍କୁ ଉଦ୍ଧାର ପାଇଁ ଅଗ୍ନିଶମବାହିନୀ ପହଞ୍ଚିଥିଲା । କୁହାଯାଉଛି ଯେ ବିସ୍ଫୋରଣ ଏତେ ପ୍ରଚଣ୍ଡ ଥିଲା ଯେ ଏହା ଯୋଗୁ ୧୦ରୁ ଅଧିକ ଲୋକ ପ୍ରାଣ ହରାଇ ଥାଇପାରନ୍ତି । ବିସ୍ଫୋରଣ ପାଖାପାଖି ୧ ଘଣ୍ଟାରୁ ଅଧିକ ସମୟ ପର୍ଯ୍ୟନ୍ତ ହୋଇଥିଲା । ୩ କିଲୋମିଟର ପର୍ଯ୍ୟନ୍ତ ଏହାର ଶବ୍ଦ ଶୁଭିଥିଲା ।
ଉକ୍ତ ଘରେ ଏକ ବେଆଇନ ବାଣ କାରଖାନା ଚାଲୁଥିଲା । ବାଣ ତିଆରି ବେଳେ ଏହି ବିସ୍ଫୋରଣ ହୋଇଥିବା କୁହାଯାଉଛି । ଖୋଦାଇବାଗ ଅଞ୍ଚଳରେ ବେଆଇନ ଭାବେ ବାଣ କାରଖାନାମାନ ଚାଲୁରହିଛି । ଏହା ପୂର୍ବରୁ ଖୋଦାଇବାଗ ଅଞ୍ଚଳର ଓଲହନପୁରରେ ଦୁଇଥର ବାଣ ବିସ୍ଫୋରଣ ହୋଇଥିଲା ।
