ନୂଆଦିଲ୍ଲୀ: ତୈଳ କଂପାନିଗୁଡ଼ିକ ବାଣିଜ୍ୟିକ ଏଲପିଜି ସିଲିଣ୍ଡର ମୂଲ୍ୟରେ ୭ ଟଙ୍କା ବୃଦ୍ଧି କରିଛନ୍ତି। ଏହି ବୃଦ୍ଧି ପରେ ଦିଲ୍ଲୀରେ ୧୯ ଜେକିଆ ବାଣିଜ୍ୟିକ ଏଲପିଜି ସିଲିଣ୍ଡରର ଖୁଚୁରା ବିକ୍ରି ମୂଲ୍ୟ ୧୭୭୩ ଟଙ୍କାରୁ ୧୭୮୦ ଟଙ୍କାକୁ ବୃଦ୍ଧି ପାଇଛି। ମୁମ୍ବାଇରେ ବାଣିଜ୍ୟିକ ଏଲପିଜି ସିଲିଣ୍ଡର ମୂଲ୍ୟ ୧,୭୩୩.୫୦ ଟଙ୍କାରୁ ୧,୭୪୦.୫୦ ଟଙ୍କାକୁ ବୃଦ୍ଧି ପାଇଥିବା ବେଳେ ଚେନ୍ନାଇରେ ତାହା ୧,୯୪୫ ଟଙ୍କାରୁ ୧,୯୫୨ ଟଙ୍କାକୁ ଏବଂ କୋଲକାତାରେ ୧,୮୯୫ ଟଙ୍କାରୁ ୧,୯୦୨ ଟଙ୍କାକୁ ବୃଦ୍ଧି ପାଇଛି।
ତେବେ ରୋଷେଇ ପାଇଁ ବ୍ୟବହାର ହେଉଥିବା ୧୪.୨ କେଜିଆ ଏଲପିଜି ସିଲିଣ୍ଡର ମୂଲ୍ୟରେ ପରିବର୍ତ୍ତନ କରାଯାଇନାହିଁ। ତାହାର ମୂଲ୍ୟ ପ୍ରାୟ ୧୧୨୯ ଟଙ୍କା ରହିଛି। ଚଳିତ ବର୍ଷ ମେ ଓ ଜୁନ୍ ମାସରେ ହୋଇଥିବା ବାଣିଜ୍ୟିକ ଏଲପିଜି ସିଲିଣ୍ଡରର କ୍ରମାଗତ ଦୁଇ ମାସର ମୂଲ୍ୟ ହ୍ରାସ ପରେ ଏହି ଦର ବୃଦ୍ଧି କରାଯାଇଛି। ଗତ ମେ’ ମାସରେ କଂପାନିଗୁଡ଼ିକ ବାଣିଜ୍ୟିକ ଏଲପିଜି ସିଲିଣ୍ଡରର ମୂଲ୍ୟ ୧୭୨ ଟଙ୍କା ହ୍ରାସ କରିଥିବା ବେଳେ ଜୁନ୍ରେ ତାହା ୮୩ ଟଙ୍କା ହ୍ରାସ ପାଇଥିଲା। ବାଣିଜ୍ୟିକ ଏଲପିଜି ସିଲିଣ୍ଡର ଶିଳ୍ପ ଏବଂ ବାଣିଜ୍ୟିକ ଆବଶ୍ୟକତା ପାଇଁ ବ୍ୟବହୃତ ହୁଏ। ତୈଳ ବିପଣନ କମ୍ପାନୀଗୁଡିକ ସାଧାରଣତଃ ପ୍ରତି ମାସର ପ୍ରଥମ ଦିନରେ ଏଲପିଜି ମୂଲ୍ୟ ସଂଶୋଧନ କରନ୍ତି । ଘରୋଇ ରନ୍ଧନ ଗ୍ୟାସ ଦର ସ୍ଥାନୀୟ ଟିକସ ଉପରେ ନିର୍ଭର କରି ବିଭିନ୍ନ ରାଜ୍ୟରେ ଭିନ୍ନ ଭିନ୍ନ ହୋଇଥାଏ ।
