ବୌଦ୍ଧ ୩୦।୬: ବୌଦ୍ଧ ଜିଲ୍ଲା କଣ୍ଟାମାଳ ଥାନା ତାଲବେଡା ଗ୍ରାମର ଜଣେ ଯୁବକ ଦାଦନ ଖଟିବାକୁ ସୁଦୁର ତାମିଲନାଡୁ ଯାଇଥିବା ବେଳେ ଟ୍ରକ୍ ଦୁର୍ଘଟଣାରେ ତାଙ୍କର ମୃତ୍ୟୁ ହୋଇଥିବା ସୂଚନା ମିଳିଛି ।
ସୂଚନାଯୋଗ୍ୟ ଯେ, ବୌଦ୍ଧ ଜିଲ୍ଲା କଣ୍ଟାମାଳ ଥାନା ତାଲବେଡା ଗ୍ରାମର ଇତିହାସ ରଣାଙ୍କ ପୁଅ ମୁକେଶ ରଣା ୪ ମାସ ପୂର୍ବେ ଦାଦନ ଖଟିବାକୁ ଯାଇ ସୁଦୂର ତାମିଲନାଡୁ ବେମ୍ବିସେଲ ସହରର ଏକ ଚିଙ୍ଗୁଡ଼ି କାରଖାନାରେ କାମ କରୁଥିଲେ। ବୁଧବାର ତାଙ୍କର ଜଣେ ସହକର୍ମୀଙ୍କ ସହିତ କାମ କରିବାକୁ ବାଇକ୍ ଯୋଗେ କାରଖାନାକୁ ଯାଉଥିବା ବେଳେ ବେମ୍ବିସେଲ ମୁଖ୍ୟ ରାସ୍ତାରେ ଏକ ଟ୍ରକ୍ ତାଙ୍କୁ ଧକ୍କା ଦେଇଥିଲା । ଫଳରେ ଉଭୟ ବାଇକ୍ ଆରୋହୀଙ୍କର ଘଟଣାସ୍ଥଳରେ ହିଁ ମୃତ୍ୟୁ ହୋଇଥିଲା । ସ୍ଥାନୀୟ ପୋଲିସ ଘଟଣାସ୍ଥଳରେ ପହଞ୍ଚି ଉଭୟ ମୃତକଙ୍କ ଶବକୁ ଜବତ କରି ତଦନ୍ତ ଜାରି ରଖିଥିବା ସୂଚନା ମିଳିଛି ।
ମୃତ ମୁକେଶଙ୍କ ପରିବାର ଅତି ଗରିବ ଶ୍ରେଣୀର । ଘର ତିଆରି କରିବା ସହିତ ତାଙ୍କ ବାହାଘର ପାଇଁ ଅର୍ଥ ରୋଜଗାର ପାଇଁ ଗତ ୪ ମାସ ତଳେ ତାମିଲନାଡୁ ଯାଇଥିଲେ । ଏବେ ଘରକୁ ପୁଅର ଶବ ଆଣିବାକୁ ପରିବାର ପାଖରେ ସମ୍ବଳ ନ ଥିବାରୁ ଜିଲ୍ଲା ଶ୍ରମ ବିଭାଗକୁ ଅନୁରୋଧ କରିବା ପରେ ବେମ୍ବିସେଲ କର୍ତ୍ତୃପକ୍ଷଙ୍କ ସହିତ କଥାବାର୍ତ୍ତା କରି ଶବ ଆଣିବାକୁ ବ୍ୟବସ୍ଥା କରାଯାଉଥିବା ଜଣାପଡିଛି ।
