ଢେଙ୍କାନାଳ ୨।୬: ମା’ ପାଖରୁ ଗାଏବ ହୋଇଗଲା ନାବାଳିକା ଭିନ୍ନକ୍ଷମ ଝିଅ । ଢେଙ୍କାନାଳ ବସଷ୍ଟାଣ୍ଡରେ ବୁଧବାର ରାତି ପ୍ରାୟ ୮ଟା ବେଳେ ଏପରି ଅଭାନୀୟ ଘଟଣା ଘଟିଛି । ଯାହାକୁ ନେଇ ଢେଙ୍କାନାଳ ସହରରେ ବେଶ ଛାଞ୍ଚଲ୍ୟ ସୃଷ୍ଟି କରିଛି । ଘଟଣା ଘଟିବା ପରେ ସ୍ଥାନୀୟ ଲୋକେ ରୁଣ୍ଡ ହୋଇଥିଲେ । ଖବର ପାଇ ଟାଉନ ପୋଲିସ ପହଞ୍ଚି ତନାଘନା ଆରମ୍ଭ କରିଥିଲା । ପରେ ଖବର ପାଇ ସଦର ଥାନା ଗୋବିନ୍ଦପୁର ଅଞ୍ଚଳର ଏକ ନିଛାଟିଆ ଜଙ୍ଗଲରୁ ନାବାଳିକାଙ୍କୁ ଉଦ୍ଧାର କରିଥିଲା ଟାଉନ ପୋଲିସ । ତେବେ ଭିନ୍ନକ୍ଷମ ନାବାଳିକାଙ୍କୁ ଏକ ଅଟୋରେ ଅପହରଣ କରି ନେଇଥିବା ଅଟୋ ସହ ଡ୍ରାଇଭର ଫେରାର ହୋଇଯାଇଛି । ନାବାଳିକା ଜଣଙ୍କ ଦୃଷ୍ଟି ହରାଇ ଥିବା ଭିନ୍ନକ୍ଷମ ଓ ବୟସ ୧୩ ବର୍ଷ ବୋଲି ଜଣାପଡିଛି ।
ସୂଚନାଯୋଗ୍ୟ ଯେ, ଢେଙ୍କାନାଳ ଜିଲ୍ଲା ପରଜଙ୍ଗ ଥାନା ସାନ୍ଦା ଅଞ୍ଚଳର ନାବାଳିକାଙ୍କର ପରିବାର ଅତ୍ୟନ୍ତ ଗରିବ ହୋଇଥିବାରୁ ନାବାଳିକା ଜଣଙ୍କ ଢେଙ୍କାନାଳରେ ଏକ ଭିନ୍ନକ୍ଷମ ଆବାସିକ ସ୍କୁଲରେ ରହି ପାଠ ପଢ଼ନ୍ତି । ଛୁଟିରେ ତାଙ୍କ ମା’ଙ୍କ ସହ ଗାଁକୁ ଯିବାପାଇଁ ଢେଙ୍କାନାଳ ବସଷ୍ଟାଣ୍ଡରେ ବସକୁ ନାବାଳିକା ଜଣଙ୍କ ଅପେକ୍ଷା କରିଥିଲେ । କିନ୍ତୁ ହଠାତ ମା’ଙ୍କ ନିକଟରୁ ନାବାଳିକା ଜଣଙ୍କ ଗାଏବ ହୋଇଯାଇଥିଲେ । ଫଳରେ ଝିଅକୁ ନପାଇ ମା’ କାନ୍ଦିବାରୁ ସ୍ଥାନୀୟଲୋକେ ରୁଣ୍ଡ ହୋଇ ପୋଲିସକୁ ଖବର ଦେଇଥିଲେ । ଟାଉନ ଥାନା ପୋଲିସ ଗାଏବ ନାବାଳିକାଙ୍କ ମା’କୁ ନେଇ ବିଭିନ୍ନ ସ୍ଥାନରେ ଛାନଭିନ କରିଥିଲା ।
ନାବାଳିକା ଜଣଙ୍କ ଦୃଷ୍ଟିହୀନ ହୋଇଥିବାର ସୁଯୋଗ ନେଇ ତାଙ୍କୁ ବସଷ୍ଟାଣ୍ଡରୁ ଜଣେ ଅଟୋ ଡ୍ରାଇଭର ଅଟୋରେ ଗୋବିନ୍ଦପୁର ଅଂଚଳର ଏକ ଜଙ୍ଗଲ ନିକଟ ନିଛାଟିଆ ସ୍ଥାନକୁ ନେଇ ପଳାଇଥିଲେ । ତେବେ ନବାଳିକାଙ୍କ ଚିତ୍କାର ଶୁଣି କିଛି ଯୁବକ ପହଞ୍ଚି ଯିବାରୁ ଅଟୋ ଡ୍ରାଇଭର ଅଟୋ ନେଇ ଫେରାର ହୋଇଯାଇଥିଲା । ପରେ ଯୁବକମାନଙ୍କଠାରୁ ସୂଚନା ପାଇ ଟାଉନ ପୋଲିସ ପହଞ୍ଚି ନାବାଳିକାଙ୍କୁ ଉଦ୍ଧାର କରି ଘଟଣାର ଅଧିକ ତଦନ୍ତ ଜାରି ରଖିଛି ।
