ମାଲକାନଗିରି ୧୬।୦୬ : ବନବିଭାଗ ଚଢାଉ । ଲକ୍ଷାଧିକ ଟଙ୍କାର ମୂଲ୍ୟବାନ ଶାଗୁଆନ୍ କାଠ ଜବତ । ମାଲକାନଗିରି ବନ ବିଭାଗ ତରଫରୁ ଏହି ଚଢାଉ କରାଯାଇଛି । ଘଟଣାରେ ଜଣଙ୍କୁ ଗିରଫ କରି ପଚରାଉଚରା କରୁଛି ବନବିଭାଗ ।
ଖବର ଅନୁଯାୟୀ, ଜିଲ୍ଲାର ଏମ.ଭି.୧୯ ଗ୍ରାମର ବଳରାମ ହିଆଲଙ୍କ ଘରେ ଚୋରା କାଠ ରହିଥିବା ନେଇ ବନ ବିଭାଗକୁ ସୁଚନା ମିଳିଥିଲା । ଏହା ପରେ ମାଲକାନଗିରି ଡି.ଏଫ.ଓଙ୍କ ନିର୍ଦ୍ଦେଶ କ୍ରମେ ମାଲକାନଗିରି ବନାଞ୍ଚଳ ଅଧିକାରୀ ଜଗନ୍ନାଥ ବିଷୋୟୀଙ୍କ ନେତୃତ୍ବରେ ବନ ବିଭାଗରଏକ ସ୍ବତନ୍ତ୍ର ଟିମ୍ ଏମ.ଭି.୧୯ ଗାଁରେ ଅଚାନକ ଚଢାଉ କରିଥିଲା । ବଳରାମ ହିଆଲଙ୍କ ବାସ ଗୃହରୁ ବନ କର୍ମଚାରୀ ମାନେ ୨ ଲକ୍ଷ ଟଙ୍କାରୁ ଅଧିକ ମୂଲ୍ୟବାନ କାଠ ପଟ୍ଟା ଜବତ କରିଥିଲେ । ଯାହା ମଧ୍ୟରେ ରହିଛି ସାଗୁଆନ, ପିଆଶାଳ ଏବଂ ଜାମୋକୋଳି କାଠର ମୋଟ ୪୧ ଟି ସାଇଜ ଓ ୩୮ଟି କାଠ ପଟ୍ଟା । ଏହା ସହ ନିଜ ଘର ପଛ ପଟେ ଜମିରେ ଥିବା ଏକ ଘଙ୍ଗା ଘରେ ଲୁଚେଇ ରଖିଥିବା କାଠକୁ ମଧ୍ୟ ଜବତ କରିଛି ବନ ବିଭାଗ । ଅଭିଯୁକ୍ତ ବଳରାମ ହିଆଲଙ୍କୁ ବନ ବିଭାଗ ଗିରଫ କରି ଅଧିକ ପଚରା ଉଚରା କରୁଛି ।
