ମୁମ୍ବାଇ ୨୦/୧୧: ଦେଶର ରାଜଧାନୀ ଦିଲ୍ଲୀରେ କରୋନା ସଂକ୍ରମଣ ଦ୍ରୁତ ଗତିରେ ବଢ଼ିଚାଲିଛି। ଦିଲ୍ଲୀକୁ ଲୋକେ ଯିବାକୁ ବି ଭୟ କଲେଣି। ଏହାକୁ ଦୃଷ୍ଟିରେ ରଖି ମହାରାଷ୍ଟ୍ର ସରକାର ବଡ଼ ନିଷ୍ପତ୍ତି ନେବାକୁ ଯାଉଛନ୍ତି। ମୁମ୍ବାଇରୁ ଦିଲ୍ଲୀ ବିମାନ ଓ ଟ୍ରେନ୍ ଚଳାଚଳ ବନ୍ଦ କରିବାକୁ ମହାରାଷ୍ଟ୍ର ସରକାର ବିଚାର କରୁଥିବା ଜଣାପଡ଼ିଛି। ତେବେ ଏହାକୁ ନେଇ ସରକାର ଖୁବଶୀଘ୍ର ନିଷ୍ପତ୍ତି ନେଇପାରନ୍ତି।
ଦିଲ୍ଲୀରେ କରୋନା ସଂକ୍ରମିତଙ୍କ ସଂଖ୍ୟା ବଢ଼ୁଥିବା ବେଳେ ଦୁଇ ଦିନ ହେଲା ମୁମ୍ବାଇରେ ବି କରୋନା ମାମଲା ବୃଦ୍ଧି ପାଉଛି। ଏନେଇ ଚିନ୍ତିତ ରାଜ୍ୟ ସରକାର ସଂକ୍ରମଣ ଚେନ୍ ଭାଙ୍ଗିବା ପାଇଁ ଏଭଳି ନିଷ୍ପତ୍ତି ନେବାକୁ ଯାଉଛନ୍ତି ବୋଲି କୁହାଯାଉଛି। ତେବେ ଗୁରୁବାର ବସିଥିବା ବୈଠକରେ ଏଭଳି ପ୍ରସ୍ତାବକୁ ଗ୍ରୀନ୍ ସିଗ୍ନାଲ ଦେଇଛନ୍ତି ମୁଖ୍ୟମନ୍ତ୍ରୀ ଉଦ୍ଧବ ଠାକରେ। ଏବେ ତମାମ ଏଜେନ୍ସିଗୁଡ଼ିକ ସହ ଆଲୋଚନା ପରେ ଆଦେଶ ଜାରି କରାଯିବ।
ଏହା ବ୍ୟତୀତ ବିଏମସି ମୁମ୍ବାଇର ସମସ୍ତ ସ୍କୁଲ ଡିସେମ୍ବର ୩୧ ଯାଏଁ ବନ୍ଦ ରଖିବାକୁ ନିଷ୍ପତ୍ତି ନେଇଛି। ୨୩ ନଭେମ୍ବରରୁ ନବମରୁ ଦ୍ବାଦଶ ଶ୍ରେଣୀ ପର୍ଯ୍ୟନ୍ତ ସ୍କୁଲ୍ ଖୋଲିବାକୁ ନିଷ୍ପତ୍ତି ହୋଇଥିଲା। ତେବେ କୋଭିଡର ଦ୍ବିତୀୟ ଳହର ଓ ସାବଧାନତା ଅବଲମ୍ବନ ପାଇଁ ଏହି ତାରିଖକୁ ଘୁଞ୍ଚାଇ ଦିଆଯାଇଛି।
