ନୂଆଦିଲ୍ଲୀ ୨୬/୦୫: କୋଭିଡ୍-୧୯ ର ଦ୍ୱିତୀୟ ଲହର ପୁଣିଥରେ ଲୋକମାନଙ୍କୁ ଅସୁବିଧାରେ ପକାଇଛି । ଅନେକ ଲୋକ ବେରୋଜଗାର ହୋଇଯାଇଛନ୍ତି । ଫିଲ୍ମ ଇଣ୍ଡଷ୍ଟ୍ରିରେ ସୁଟିଂ ବିଭିନ୍ନ ସହରକୁ ସ୍ଥାନାନ୍ତରିତ ହୋଇଛି କିମ୍ବା ମାମଲା ବୃଦ୍ଧି ହେତୁ ସୁଟିଂ ବନ୍ଦ ହୋଇଯାଇଛି। ଏହି ସମୟରେ ଅକ୍ଷୟ କୁମାର ପୁଣି ଥରେ ସାହାଯ୍ୟ କରିବାକୁ ଆଗେଇ ଆସିଛନ୍ତି। ସୂଚନା ଅନୁଯାୟୀ, ଅକ୍ଷୟ କୁମାର ପ୍ରତି ମାସରେ ୩,୬୦୦ ନୃତ୍ୟଶିଳ୍ପୀଙ୍କୁ ମାଗଣାରେ ରାସନ ଯୋଗାଇବା ଦାୟିତ୍ୱ ଗ୍ରହଣ କରିଛନ୍ତି। କୋରିଓଗ୍ରାଫର୍ ଗଣେଶ ଆଚାର୍ଯ୍ୟ ଏକ ଇଣ୍ଟରଭ୍ୟୁରେ ଏହି ସୂଚନା ଦେଇଛନ୍ତି।
ଗଣେଶ ଆଚାର୍ଯ୍ୟଙ୍କ ନିର୍ଦ୍ଦେଶରେ ଅକ୍ଷୟ ପ୍ରତି ମାସରେ ଇଣ୍ଡଷ୍ଟ୍ରିର ୩,୬୦୦ ନୃତ୍ୟଶିଳ୍ପୀଙ୍କୁ ମାଗଣା ରାସନ ପ୍ରଦାନ କରିବାକୁ ନିଷ୍ପତ୍ତି ନେଇଛନ୍ତି। କୋରିଓଗ୍ରାଫର ଗଣେଶ କହିଛନ୍ତି, ଅକ୍ଷୟ ତାଙ୍କର ୫୦ ତମ ଜନ୍ମଦିନରେ ତାଙ୍କୁ କଣ ସାହାଯ୍ୟ କରିପାରିବେ ବୋଲି ପଚାରିଥିଲେ। ଏହା ପରେ ଗଣେଶ ଅକ୍ଷୟଙ୍କୁ ଇଣ୍ଡଷ୍ଟ୍ରିର ୧,୬୦୦ ଜୁନିଅର ନୃତ୍ୟଶିଳ୍ପୀ ଏବଂ ୨,୦୦୦ ବ୍ୟାକଗ୍ରଉଣ୍ଡ୍ ନୃତ୍ୟଶିଳ୍ପୀଙ୍କୁ ସାହାଯ୍ୟ କରିବାକୁ ଅନୁରୋଧ କରିଥିଲେ। ଅକ୍ଷୟ ଗଣେଶଙ୍କ ଅନୁରୋଧ ଗ୍ରହଣ କରିଥିଲେ।
ସୁରକ୍ଷା ଏବଂ ସ୍ୱାସ୍ଥ୍ୟ ପ୍ରୋଟୋକଲକୁ ଦୃଷ୍ଟିରେ ରଖି ଏହି ଅଭିଯାନ ଆରମ୍ଭ ହେବ ବୋଲି ଗଣେଶ କହିଛନ୍ତି। ନୃତ୍ୟଶିଳ୍ପୀ କିମ୍ବା କୋରିଓଗ୍ରାଫର ପ୍ରତି ମାସରେ ଟଙ୍କା କିମ୍ବା ରାସନ କିଟ୍ ପାଇବେ । ଗଣେଶ କହିଛନ୍ତିଯେ ‘ମୋ ପତ୍ନୀ ଗଣେଶ ଆଚାର୍ଯ୍ୟ ଫାଉଣ୍ଡେସନ ମାଧ୍ୟମରେ ଏହି କାର୍ଯ୍ୟକଳାପ ସହିତ ଗଭୀର ଭାବରେ ଜଡିତ ଅଛନ୍ତି। ସେ ବ୍ୟକ୍ତିଗତ ଭାବେ ପ୍ୟାକିଂ ଏବଂ ବିତରଣର ତଦାରଖ କରୁଛନ୍ତି ।
ଏହା ପ୍ରଥମ ଥର ନୁହେଁ ଅକ୍ଷୟ ଲୋକଙ୍କୁ ସାହାଯ୍ୟ କରୁଛନ୍ତି, ଏହା ପୂର୍ବରୁ ସେ କରୋନା ରୋଗୀଙ୍କ ପାଇଁ ଅକ୍ସିଜେନ୍ କନସେନଟ୍ରେଟରର ବ୍ୟବସ୍ଥାକରିଥିଲେ । ଏହା ପରେ ଗୌତମ ଗମ୍ଭୀରଙ୍କ ଫାଉଣ୍ଡେସନକୁ ଏକ କୋଟି ଟଙ୍କା ଦାନ କରିଥିଲେ। ଗତ ବର୍ଷ ଅକ୍ଷୟ ପିଏମ କେୟାର ଫଣ୍ଡରେ ୨୫ କୋଟି ଟଙ୍କା ଯୋଗଦାନ କରିଥିଲେ। ଏହା ପରେ ବ୍ରିହାନମ୍ବାଇ ମ୍ୟୁନିସିପାଲିଟି କର୍ପୋରେସନ୍ (ବିଏମସି) କୁ ପିପିଏ କିଟ୍ କିଣିବା ପାଇଁ ତିନି କୋଟି ଟଙ୍କା ମଧ୍ୟ ଦେଇଥିଲେ।