ବନ୍ଧୁ ଆପଣଙ୍କୁ ଆମ ନ୍ୟୁଜ ପୋର୍ଟାଲକୁ ସ୍ଵାଗତ ଆପଣଙ୍କ ପାଇଁ ଆମେ ସବୁବେଳେ କିଛି କିଛି ଖାସ ଖବର ନେଇ ଆସିବୁ ତେବେ ଚାଲନ୍ତୁ ଆଲୋଚନା କରିବା ଆଜି ର ବିଷୟ ବସ୍ତୁ ଉପରେ.
ନୂଆଦିଲ୍ଲୀ : ଗତବର୍ଷ ନଭେମ୍ବର ଓ ଡିସେମ୍ବରରେ ଦରଦାମ୍ ସାମାନ୍ୟ ହ୍ରାସ ପରେ ଜାନୁଆରିରେ ପୁଣି ବୃଦ୍ଧି ପାଇଛି। ସରକାରୀ ସୂଚନା ଅନୁସାରେ ଖୁଚୁରା ମୁଦ୍ରାସ୍ଫୀତି ହାର ୬.୫୨%କୁ ବୃଦ୍ଧି ପାଇ ପୁଣି ନିୟନ୍ତ୍ରଣ ବାହାରକୁ ଚାଲିଯାଇଛି। ଏଭଳି ପରିସ୍ଥିତି ଆଗକୁ ମଧ୍ୟ ଜାରି ରହିପାରେ। ନିକଟ ଭବିଷ୍ୟତରେ ଏଥିରୁ ନିସ୍ତାର ମିଳିବାର ନାହିଁ। ବିଶେଷ କରି ମହଙ୍ଗା ପନିପରିବା ଯୋଗୁଁ ଏଭଳି ପରିସ୍ଥିତି ସୃଷ୍ଟି ହୋଇଛି। ଏହା ସାଧାରଣ ଖାଉଟୀ ଠାରୁ ଆରମ୍ଭ କରି ଅର୍ଥନୀତି ପରିଚାକଙ୍କୁ ମଧ୍ୟ ଚିନ୍ତାରେ ପକାଇଦେଇଛି।
ମୁଦ୍ରାସ୍ଫୀତିକୁ ୬ ପ୍ରତିଶତ ମଧ୍ୟରେ ରଖିବା ଲାଗି ରିଜର୍ଭ ବ୍ୟାଙ୍କକୁ କୁହାଯାଇଛି। ୨୦୨୨ ଡିସେମ୍ବରରେ ମୁଦ୍ରାସ୍ଫୀତି ହାର ୫.୭୨ ପ୍ରତିଶତ ଥିବା ବେଳେ ଜାନୁଆରିରେ ତାହା ୬.୫୨%ରେ ପହଞ୍ଚିବା ନିଶ୍ଚିତ ରୂପେ ଚିନ୍ତାର ବିଷୟ। ଗତ ମାସରେ ବିଭିନ୍ନ ସାମଗ୍ରୀର ଖୁଚୁରା ମୂଲ୍ୟରେ ବୃଦ୍ଧି ହୋଇଥିବା ଏଥିରୁ ସ୍ପଷ୍ଟ ହୋଇଛି। ଜାନୁଆରି ମାସରେ ପନିପରିବା ଦାମ୍ ୧୧.୭୦ ପ୍ରତିଶତ ବଢ଼ିଥିବା ବେଳେ ଇନ୍ଧନ ଓ ଆଲୋକ ପ୍ରଦାନକାରୀ ସାମଗ୍ରୀ ଦାମ୍ରେ ସାମାନ୍ୟ ହ୍ରାସ ଘଟିଛି। ଦେଶର ଖୁଚୁରା ମୁଦ୍ରାସ୍ଫୀତି ଏବେ ୩ ମାସର ସର୍ବୋଚ୍ଚ ସ୍ତରକୁ ବୃଦ୍ଧି ପାଇଛି। ତେଣୁ ଆଗାମୀ ଦିନରେ ଭାରତୀୟ ରିଜର୍ଭ ବ୍ୟାଙ୍କ ସୁଧ ହାରରେ ଆହୁରି ବୃଦ୍ଧି କରିବାର ଆଶଙ୍କା ସୃଷ୍ଟି ହୋଇଛି।
ଗତବର୍ଷ ସାରା ଖୁଚୁରା ମୁଦ୍ରାସ୍ଫୀତି ହାର ଉଚ୍ଚ ସ୍ତରରେ ଥିଲା। ମେ’ରେ ୭.୪ ପ୍ରତିଶତ, ଜୁନ୍ରେ ୭ ପ୍ରତିଶତ, ଜୁଲାଇରେ ୬.୭୧ ପ୍ରତିଶତ, ଅଗଷ୍ଟରେ ୭ ପ୍ରତିଶତ, ସେପ୍ଟେମ୍ବରରେ ୭.୪୧ ପ୍ରତିଶତ ଓ ଅକ୍ଟୋବରରେ ୬.୭୭ ପ୍ରତିଶତ ଥିଲା। ଖୁଚୁରା ମୁଦ୍ରାସ୍ଫୀତିକୁ ୬ ପ୍ରତିଶତ ମଧ୍ୟରେ ରଖିବା ଲାଗି କେନ୍ଦ୍ର ସରକାର ରିଜର୍ଭ ବ୍ୟାଙ୍କକୁ କହିଛନ୍ତି। ସେହି ଲକ୍ଷ୍ୟ ହାସଲ କରିବାରେ ରିଜର୍ଭ ବ୍ୟାଙ୍କ ବିଫଳ ହେବାରୁ ସରକାରଙ୍କୁ ତାହାର କାରଣ ଜଣାଇବାକୁ ପଡ଼ିଥିଲା।
କେବଳ ଭାରତ ନୁହେଁ ବିଶ୍ବବ୍ୟାପୀ ଦରଦାମ୍ ସ୍ଥିତି ଅନେକ ଦେଶ ଲାଗି ଚିନ୍ତାର କାରଣ ପାଲଟିଛି। ଆମେରିକା ଓ ବ୍ରିଟେନ୍ ଭଳି ଶକ୍ତିଶାଳୀ ଦେଶ ଦରଦାମ୍ ରାକ୍ଷାସ କବଳରୁ ଉଦ୍ଧାର ପାଇବାକୁ ସଂଘର୍ଷ କରୁଛନ୍ତି। ଦରଦାମ୍ର ମୁକାବିଲା ଲାଗି ବିଭିନ୍ନ ଦେଶର କେନ୍ଦ୍ରୀୟ ବ୍ୟାଙ୍କ ସୁଧ ବଢ଼ାଇବା ଜାରି ରଖିଛନ୍ତି। ଗତବର୍ଷ ରୁଷ୍-ୟୁକ୍ରେନ୍ ଯୁଦ୍ଧ ଆରମ୍ଭ ହେବା ପରଠାରୁ ଦରଦାମ୍ ସ୍ଥିତି ଅଣାୟତ୍ତ ରହିଛି।
