ନୂଆଦିଲ୍ଲୀ, ୧୩|୦୮: ପାରିବାରିକ ବିବାଦରୁ ଭୟଙ୍କର ଅଘଟଣ । ୟୁରୋପର ମୋଣ୍ଟେନେଗ୍ରୋରେ ପାରିବାରିକ ବିବାଦରୁ ଗୁଳିକାଣ୍ଡ ଘଟିଛି । କଳହରେ ଅଧୈର୍ଯ୍ୟ ହୋଇ ଜଣେ ଯୁବକ ମନଇଚ୍ଛା ଗୁଳିମାଡ କରିଥିଲେ । ଯେଉଁଥିରେ ୧୧ଜଣଙ୍କ ମୃତ୍ୟୁ ହୋଇଛି । ଏହାସହ ଅନେକ ଆହତ ହୋଇଛନ୍ତି । ଆରଟିସିଜି ଟିଭି ଅନୁସାରେ, ଅଭିଯୁକ୍ତ ଘର ଗଳିରେ ଶିଶୁଙ୍କ ସମେତ ଅନ୍ୟମାନଙ୍କୁ ଗୁଳି ଚଳାଇଥିଲା । ଯେଉଁଥିରେ ଅନେକ ମୃତାହତ ହୋଇଥିଲେ ।
କଣ ପାଇଁ ପରିବାର ବିବାଦ
ପୋଲିସର କହିବାନୁସାରେ, ଏଥିପାଇଁ କୌଣସି ବୟାନ ଜାରି କରାଯାଇ ନାହିଁ । ତଦନ୍ତ ପରେ ହିଁ ସବୁକିଛି ତଥ୍ୟ ଦିଆଯିବ । ଯେଉଁଠି ଏହି ଗୁଳିକାଣ୍ଡ ଘଟିଛି ତାହା ରାଜଧାନୀ ପଣ୍ଡଗୋରିକାରୁ ୩୬ କିମି ଦୂରରେ ରହିଛି । ଏବେ ପୋଲିସ ପୁରା ଘର ଓ ଗଳିକୁ ନାକାବନ୍ଦୀ କରିଛି । ଆହୁରି ମଧ୍ୟ ପୋଲିସ ଗୁଳିମାଡ କରିଥିବା ଆତତାୟୀକୁ ନିପାତ କରିଥିବା କୁହାଯାଉଛି । କିନ୍ତୁ ଏନେଇ ସରକାରୀ ଭାବେ କିଛି ଘୋଷଣା କରାଯାଇ ନାହିଁ ।
ଗୁଳିକାଣ୍ଡ ପରେ ମୋଣ୍ଟେନେଗ୍ରୋବାସୀ ଭୟଭୀତ ଅବସ୍ଥାରେ ଅଛନ୍ତି । କାରଣ ଏଠାକୁ ଅଧିକ ପର୍ଯ୍ୟଟକ ଆସିଥାନ୍ତି । ଯେଉଁପରି ଭାବେ ୧୧ଜଣଙ୍କୁ ହତ୍ୟା କରାଗଲା ତାକୁ ନେଇ ଆଇନ ବ୍ୟବସ୍ଥା ଉପରେ ପ୍ରଶ୍ନବାଚୀ ସୃଷ୍ଟି ହୋଇଛି । ଲୋକେ ପୋଲିସର କାର୍ଯ୍ୟାନୁଷ୍ଠାନ ନେଇ ମଧ୍ୟ ଖୁସି ନାହାଁନ୍ତି ।
