ମୁମ୍ବାଇ, ୨୩।୦୪: ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁର ଅଧିନାୟକ ବିରାଟ କୋହଲି ଦଳର ଓପନର୍ ଦେବଦତ୍ତ ପାଡିକଲଙ୍କୁ ପ୍ରଶଂସା କରିଛନ୍ତି । ପାଡିକଲ ରାଜସ୍ଥାନ ରୟାଲ୍ସ ବିପକ୍ଷରେ ଅପରାଜିତ ୧୦୧ ରନ୍ କରିଥିଲେ । ଏହି ପାଳି ବଳରେ ଆରସିବି ଆଇପିଏଲ-୨୦୨୧ରେ ଲଗାତର ଚତୁର୍ଥ ବିଜୟ ହାସଲ କରିଛି ।
ବିରାଟ ମ୍ୟାଚ୍ ପରେ କହିଥିଲେ ଯେ, ଏହି ମ୍ୟାଚ୍ ବହୁତ ଭଲ ଥିଲା । ପାଡିକଲ ଗତ ସିଜିନରେ ମଧ୍ୟ ଭଲ ପ୍ରଦର୍ଶନ କରିଥିଲେ । ସେ ପାଡିକଲଙ୍କୁ ୪୦-୫୦ ରନ୍ କରିବା ପାଇଁ କହିଥିଲେ । କିନ୍ତୁ ପାଡିକଲ ବଡ ପାଳି ଖେଳିଥିଲେ । ସେ ଜଣେ ଭଲ ଖେଳାଳି । ଭବିଷ୍ୟତରେ ଭଲ ଖେଳିବେ । ଯେତେବେଳେ ପାଡିକଲ ଶତକ ନିକଟତର ଥିଲେ ସେ ତାଙ୍କୁ ମ୍ୟାଚ୍ ଶେଷ କରିବାକୁ କହିଥିଲେ । ଏହା ସେ କରିପାରିଥାନ୍ତେ ଯଦି ଏହା ତାଙ୍କର ପ୍ରଥମ ଶତକ ହୋଇନଥାନ୍ତା ବୋଲି କୋହଲି କହିଥିଲେ ।ଆରସିବି ପାଖରେ କୌଣସି ବଡ ବୋଲର ନାହାଁନ୍ତି କିନ୍ତୁ ଦଳର ବୋଲିଂ ଭଲ ଥିବା କହିଛନ୍ତି ଆରସିବି ଅଧିନାୟକ । ଦଳ ୪ଟି ମ୍ୟାଚରେ ଭଲ କରିଛି । ଡେଥ୍ ଓଭରରେ ମଧ୍ୟ ୩୦ରୁ ୩୫ ରନ୍ ବଞ୍ଚାଇଛି ।
ମ୍ୟାନ୍ ଅଫ୍ ଦି ମ୍ୟାଚ୍ ହୋଇଥିବା ଦେବଦତ୍ତ ପାଡିକଲ କହିଥିଲେ ଯେ, ଏହି ଇନିଂସ ତାଙ୍କ ପାଇଁ ବହୁତ ଖାସ୍ ଥିଲା । ସେ ପ୍ରଥମ ମ୍ୟାଚ୍ ଖେଳିପାରି ନଥିଲେ । ଶତକ ନିକଟତର ହୋଇଥିଲେ ବି ଚାପ ନଥିଲା । କାରଣ ନିଜ ଶତକ ଅପେକ୍ଷା ଦଳର ବିଜୟ ଅଧିକ ଗୁରୁତ୍ୱପୂର୍ଣ୍ଣ ବୋଲି ସେ କହିଥିଲେ ।
ଏହି ମ୍ୟାଚରେ କୋହଲି ୭୨ ରନ୍ କରିଥିଲେ । ପ୍ରଥମେ ସେ ଧିମା ବ୍ୟାଟିଂ କରିଥିଲେ ଓ ପାଡିକଲଙ୍କୁ ବଡ ସଟ୍ ଖେଳିବାକୁ ସୁଯୋଗ ଦେଇଥିଲେ ।
