ନୂଆଦିଲ୍ଲୀ: ପଶ୍ଚିମବଙ୍ଗ ପଞ୍ଚାୟତ ନିର୍ବାଚନରେ ହୋଇଥିବା ହିଂସା ପାଇଁ ବିଜେପି ଆଜି ଟିଏମ୍ସି ସରକାର ଉପରେ ପ୍ରବଳ ବର୍ଷିଛି ଏବଂ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କୁ ଅତ୍ୟନ୍ତ କ୍ରୁର ଓ ନିଷ୍ଠୁର କହିଛି। ନିର୍ବାଚନ ହିଂସାରେ ଅତି କମ୍ରେ ୪୫ ଲୋକଙ୍କ ମୃତ୍ୟୁ ହୋଇଛି ବୋଲି ବିଜେପି ଦାବି କରିଛି। ବିଜେପି କହିଛି, ଗଣମାଧ୍ୟମ ରିପୋର୍ଟ ଆଧାରରେ ରାଜ୍ୟରେ ନିର୍ବାଚନୀ ହିଂସା ପାଇଁ ୪୫ ଜଣଙ୍କ ମୃତ୍ୟୁ ହୋଇଛି। ଅନେକ ସ୍ଥାନରେ ବୁଥ୍ ଜବରଦଖଲ ହୋଇଛି। ଯୋଜନାବଦ୍ଧ ଭାବେ ହତ୍ୟାକାଣ୍ଡ ଘଟାଯାଇଛି ବୋଲି ବିଜେପି ଜାତୀୟ ମୁଖପାତ୍ର ସମ୍ବିତ ପାତ୍ର ଦାବି କରିଛନ୍ତି।
ବିଜେପି ନିର୍ବାଚନୀ ହିଂସାକୁ କଡ଼ା ନିନ୍ଦା କରି ପଶ୍ଚିମବଙ୍ଗରେ ଗଣତନ୍ତ୍ରର ହତ୍ୟା କରାଯାଇଛି ବୋଲି କହିଛି। ଉକ୍ତ ପ୍ରସଙ୍ଗରେ କଂଗ୍ରେସ, ବାମ ଦଳ ଏବଂ ଅନ୍ୟ ଦଳଗୁଡ଼ିକ ନିରବ ଥିବାରୁ ସମ୍ବିତ ପାତ୍ର ଏନେଇ ପ୍ରଶ୍ନ ଉଠାଇଛନ୍ତି। ପାତ୍ର କହିଛନ୍ତି ଯେ ଲାଲୁ ଯାଦବ, ନୀତୀଶ କୁମାର, ରାହୁଲ ଗାନ୍ଧି ଏବଂ ଅନ୍ୟମାନେ ଏବେ କୁଆଡ଼େ ଗଲେ। ମହବ୍ବତ କି ଦୁକାନ ଖୋଲିଥିବା ରାହୁଲ ଗାନ୍ଧି ପଶ୍ଚିମବଙ୍ଗରେ ନିଜର କର୍ମୀମାନଙ୍କର ହତ୍ୟାକୁ ନେଇ ନିରବ କାହିଁକି ବୋଲି ସେ ପ୍ରଶ୍ନ କରିଛନ୍ତି। ଏବେ ଭୟରେ ଅନେକ ଲୋକ ପଶ୍ଚିମବଙ୍ଗ ଛାଡ଼ି ଆସାମରେ ଆଶ୍ରୟ ନେଇଛନ୍ତି ବୋଲି ସେ ଦାବି କରିଛନ୍ତି।
