ନୂଆଦିଲ୍ଲୀ, ୨୭।୦୪: ଆଇପିଏଲର ୨୧ତମ ମୁକାବିଲାରେ ସୋମବାର ମୁହାଁମୁହିଁ ହୋଇଥିଲେ ପଞ୍ଜାବ କିଙ୍ଗସ୍ ଓ କୋଲକାତା ନାଇଟ୍ ରାଇଡର୍ସ । ଏହି ମୁକାବିଲାରେ କୋଲକାତା ଏକତରଫା ଭାବେ ୫ ଓ୍ୱିକେଟରେ ବିଜୟ ହାସଲ କରିଥିଲା । ଅହମ୍ମଦାବାଦର ନରେନ୍ଦ୍ର ମୋଦୀ ଷ୍ଟାଡିୟମରେ ଖେଳାଯାଇଥିବା ଏହି ମ୍ୟାଚ୍ରେ ପରାସ୍ତ ହେବା ପରେ ପଞ୍ଜାବ ଅଧିନାୟକ କେଏଲ ରାହୁଲଙ୍କ କଷ୍ଟ ବାରି ହୋଇ ପଡୁଥିଲା । ପରାଜୟକୁ ନେଇ ସେ କଣ କହିବେ ଜାଣି ପାରୁ ନାହାଁନ୍ତି ବୋଲି କହିଥିଲେ ।
ସୋମବାର ମ୍ୟାଚରେ ପଞ୍ଜାବ କିଙ୍ଗସ୍ ୨୦ ଓଭରରେ ୯ ଓ୍ୱିକେଟ୍ ହରାଇ ମାତ୍ର ୧୨୩ ରନ୍ କରିଥିଲା । ଜବାବରେ କେକେଆର ୧୬.୪ ଓଭରରେ ୫ ଓ୍ୱିକେଟ୍ ହରାଇ ୧୨୬ ରନ୍ କରିବା ସହ ଜିତି ନେଇଥିଲା ।ମ୍ୟାଚ୍ ପରେ କେଏଲ ରାହୁଲ କହିଥିଲେ ଯେ, ପରାଜୟ ସହଜ ନୁହେଁ । କଣ କହିବି ଜାଣି ପାରୁନାହିଁ । ପିଚ୍ ଦେଖି ନିଜକୁ ଅପଡେଟ୍ କରିବାକୁ ହେବ । କିଛି ସ୍ପଟ୍ ଡିସମିସାଲ୍ ସମସ୍ୟା ବଢାଇଥିଲା । ଏହି ପରାଜୟକୁ ଭୁଲି ଆଗକୁ ବଢିବାକୁ ଉଦ୍ୟମ କରିବା ପାଇଁ ହେବ ।
ସେ ଆହୁରି ମଧ୍ୟ କହିଥିଲେ ଯେ, ରବି ବିଶ୍ରାଇଙ୍କ କ୍ୟାଚ୍ ଆକର୍ଷଣୀୟ ଥିଲା । ଜଷ୍ଟି ରୋଡସଙ୍କ ଭଲି କୋଚ୍ ଥିଲେ ଫିଲ୍ଡିଂ ଭଲ ହୁଏ । ସେ ସମସ୍ତଙ୍କର କଠିନ ପରୀକ୍ଷା ନିଅନ୍ତି । ଖେଳାଳିମାନେ କ୍ୟାଚ୍କୁ କିପରି ରିଆକ୍ଟ କରିଥାନ୍ତି ତାହା ସେ ଶିଖାନ୍ତି । ତେବେ ଆଗକୁ ଭଲ ଖେଳିବା ନେଇ ବିଶ୍ୱାସ ରହିଥିବା ସେ କହିଥିଲେ ।
