ଜୟପୁର,୦୧/୦୨: ଜୟପୁର ବ୍ଲକ ଡଙ୍ଗରଛିଞ୍ଚି ପଞ୍ଚାୟତ ପାତ୍ରପୁଟରେ ରହୁଥିବା ପଦ୍ମଶ୍ରୀ ପୁରସ୍କାରପ୍ରାପ୍ତ କମଳା ପୂଜାରୀ ଅସୁସ୍ଥ ହୋଇ ପଡିଛନ୍ତି । ଶରୀର ସହ ଅଣ୍ଟା ବ୍ୟଥା ଓ ଦୁର୍ବଳ ଅନୁଭବ କରୁଛନ୍ତି କମଳା । ଅଧିକ ଚଲାବୁଲା କରିପାରୁନାହାନ୍ତି । ତେବେ ଚିକିତ୍ସା ନହୋଇ ସେ ଘରେ ପଡିରହିଥିବା ଜଣାପଡିଛି ।
ନିଜ ସ୍ୱାସ୍ଥ୍ୟ ସମ୍ପର୍କରେ କମଳା କହିଛନ୍ତି, କିଛି ଦିନ ହେଲା ତାଙ୍କୁ ଭଲ କିଛି ଲାଗୁନି। କିଛି ଖାଇବାକୁ ଇଚ୍ଛା ହେଉନି । ଦେହ, ହାତଗୋଡ଼ ବ୍ୟଥା ହେଉଛି । ଅଧିକ ଥଣ୍ଡା ହେଉଥିବାରୁ ଅଣ୍ଟାବ୍ୟଥା ହେଉଛି । ପୂର୍ବରୁ ପଡ଼ିଯାଇଥିବାରୁ ଅଣ୍ଟାରେ ମାଡ଼ ହୋଇଥିଲା । ଏଥିପାଇଁ ଅଣ୍ଟା ବ୍ୟଥା ମଧ୍ୟ ହେଉଥିବା ନେଇ ସେ ପ୍ରକାଶ କରିଛନ୍ତ । ଡାକ୍ତରଙ୍କୁ ଦେଖାଇଲେ କି ନାହିଁ ପଚାରିବାରୁ ମନା କରିଥିଲେ । ବୟସ ବଢ଼ିଗଲାଣି, ତେଣୁ ଦେହ ଭଲ ରହୁନଥିବା ସେ କହିଥିଲେ । ଯଦି ପ୍ରଶାସନ ପକ୍ଷରୁ ଯିବାଆସିବା ପାଇଁ ବ୍ୟବସ୍ଥା କରାଯିବ ଡାକ୍ତରଙ୍କ ପାଖକୁ ଯିବେ ବୋଲି ସେ କହିଛନ୍ତି ।
ସୂଚନାଯୋଗ୍ୟ, ୨୦୧୯ରେ କମଳାଙ୍କୁ ପଦ୍ମଶ୍ରୀ ପୁରସ୍କାର ମିଳିଥିଲା । ଏହାସହ ପାରମ୍ପରିକ ଧାନ ସଂରକ୍ଷଣ କ୍ଷେତ୍ରରେ ଉଲ୍ଲେଖନୀୟ ଅବଦାନ ଯୋଗୁ ଜାତୀୟ ଓ ଅନ୍ତର୍ଜାତୀୟ ପୁରସ୍କାର ମଧ୍ୟ ସେ ପାଇଛନ୍ତି ।
