ନୂଆଦିଲ୍ଲୀ ୨୧/୦୭: ରାଜସ୍ଥାନ ପରେ ନୂପୁର ଶର୍ମାଙ୍କ ବିବାଦୀୟ ବୟାନକୁ ନେଇ ମଧ୍ୟପ୍ରଦେଶରେ ହିଂସାକାଣ୍ଡ ଘଟିଛି । ନୂପୁର ଶର୍ମାଙ୍କୁ ସମର୍ଥନ କରିବା ଯୋଗୁଁ ଜଣେ ଯୁବକ କିଛି ଦୁର୍ବୃତ୍ତଙ୍କ ଆକ୍ରମଣର ଶିକାର ହୋଇଛନ୍ତି । ବୁଧବାର ରାତିରେ ମଧ୍ୟପ୍ରଦେଶର ଅଗର ମାଲଓ୍ବା ଜିଲ୍ଲାରରେ ଏଭଳି ଘଟଣା ଘଟିଛି । ଆୟୁଷ ଯାଦମ ନାମକ ୨୫ ବର୍ଷୀୟ ଯୁବକଙ୍କୁ ମରଣାନ୍ତକ ଆକ୍ରମଣ କରାଯାଇଥିବା ସୂଚନା ମିଳିଛି ।
ତେବେ ଆକ୍ରମଣ ଘଟଣାରେ ପୋଲିସ ୨ ଜଣଙ୍କୁ ଗିରଫ କରିଛି । ମରଣାନ୍ତକ ଆକ୍ରମଣରେ ସଂପୃକ୍ତ ଥିବା ଅଭିଯୋଗରେ ଅନ୍ୟ ୧୩ ଜଣଙ୍କ ନାଁ ରେ ମଧ୍ୟ ମାମଲା ରୁଜୁ କରାଯାଇଛି । ମିଳିଥିବା ସୂଚନା ଅନୁସାରେ, ଆୟୁଷ ତାଙ୍କ ବାଇକ ଯୋଗେ ଯାଉଥିବା ବେଳେ ଏକ ଟୋଲ୍ ବୁଥ୍ ନିକଟରେ ତାଙ୍କୁ କିଛି ଦୁର୍ବୃତ୍ତ ହଠାତ୍ ଆକ୍ରମଣ କରିଥିଲେ । ତାଙ୍କ ମୁଣ୍ଡରେ ଗଭୀର ଆଘାତ ଲାଗିଥିଲା । କୌଣସି ଧାରୁଆ ଅସ୍ତ୍ରରେ ତାଙ୍କୁ ଆକ୍ରମଣ କରାଯାଇଥିବା ଜଣାପଡିଛି । ଗୁରୁତର ଅବସ୍ଥାରେ ଆୟୁଷଙ୍କୁ ଉଦ୍ଧାର କରାଯାଇ ହସ୍ପିଟାଲରେ ଭର୍ତ୍ତି କରାଯାଇଛି । ପ୍ରଥମେ ଜିଲ୍ଲା ମୁଖ୍ୟ ଚିକିତ୍ସାଳୟ ଏବଂ ପରେ ସ୍ବାସ୍ଥ୍ୟାବସ୍ଥା ଗୁରୁତର ହେବାରୁ ତାଙ୍କୁ ଉଜ୍ଜୈନ ହସ୍ପିଟାଲକୁ ସ୍ଥାନାନ୍ତର କରାଯାଇଥିବା ଜଣାପଡିଛି ।
ଘଟଣାକୁ ନେଇ ମାଲଓ୍ବା ଏସପି ରାକେଶ ସାଗର କହିଛନ୍ତି, ନୂପୁର ଶର୍ମାଙ୍କୁ ସମର୍ଥନ କରିବାରୁ ଆୟୁଷ ଯାଦମ ନାମକ ଜଣେ ଯୁବକଙ୍କୁ ମରଣାନ୍ତକ ଆକ୍ରମଣ କରାଯାଇଥିଲା । ଆକ୍ରମଣ ଘଟଣାରେ ୨ଜଣଙ୍କୁ ଗିରଫ କରାଯାଇଛି । ଅନ୍ୟମାନଙ୍କ ଧରିବା ପାଇଁ ପୋଲିସର ଏକ ଟିମ୍ ବିଭିନ୍ନ ସ୍ଥାନରେ ଚଢାଉ ଜାରି ରଖିଛନ୍ତି’। ପୋଲିସ ଧାରା ୩୦୭(ହତ୍ୟା ଉଦ୍ୟମ), ୫୦୬ (ଅପରାଧିକ ଷଡଯନ୍ତ୍ର) ଆଧାରରେ ମାମଲା ରୁଜୁକରି ତଦନ୍ତ ଜାରି ରଖିଛି ।
