ଉମରକୋଟ ୨୯।୧୦: ନବରଙ୍ଗପୁର ଉମରକୋଟରେ ପୁଣି ମଶାଣି ବିବାଦ। ବୃଦ୍ଧଙ୍କ ମୃତଦେହ ସତ୍କାରକୁ ନେଇ ଗାଁରେ ଲାଗି ରହିଛି ଉତ୍ତେଜନା। ଶୁକ୍ରବାର ଠାରୁ ଘରେ ପଡ଼ି ରହିଛି ବୃଦ୍ଧଙ୍କ ମୃତଦେହ।
ଖବର ଅନୁଯାୟୀ, ଉମରକୋଟ ଥାନା ଗୁଲିବଡନା ଗାଁରେ ଶୁକ୍ରବାର ସକାଳେ ଜିତୁ ଭତ୍ରା ନାମକ ଜଣେ ବୃଦ୍ଧଙ୍କ ମୃତ୍ୟୁ ପରେ ତାଙ୍କ ମୃତଦେହର ସତ୍କାରକୁ ନେଇ ଗାଁରେ ଉତ୍ତେଜନା ଲାଗିରହିଛି। ବୃଦ୍ଧଙ୍କ ପରିବାର ୩-୪ ବର୍ଷ ପୂର୍ବେ ଭିନ୍ନ ଧର୍ମ ଗ୍ରହଣ କରିଥିବାରୁ ତାଙ୍କ ମୃତଦେହକୁ ଗାଁ ମଶାଣିରେ ସତ୍କାର ପାଇଁ ମନା କରିବାରୁ ଏଭଳି ବିବାଦ ଦେଖାଦେଇଛି । ଘଟଣାର ଖବର ପାଇଥିଲେ ମଧ୍ୟ ପ୍ରଶାସନ ପକ୍ଷରୁ କୌଣସି ଅଧିକାରୀ ଉକ୍ତ ଗ୍ରାମରେ ନପହଞ୍ଚିବାରୁ ଉତ୍ତେଜନା ବୃଦ୍ଧି ପାଇବାରେ ଲାଗିଛି । ଉତ୍ୟକ୍ତ ଗାଁ ଲୋକେ ନିଆଁ ଜାଳି ଜଗି ରହିଥିବାବେଳେ ବୃଦ୍ଧଙ୍କ ମୃତଦେହକୁ ଅନ୍ୟ ସ୍ଥାନକୁ ନେବାକୁ ଦାବି କରିଛନ୍ତି।
ସେପଟେ ଧର୍ମ ପରିବର୍ତ୍ତନ ଯୋଗୁଁ ଗାଁ ଲୋକେ ମଶାଣିରେ ଜାଗା ଦେଉନଥିବା କହିବା ସହ ପୋଲିସକୁ ଖବର ଦେବା ପରେ ମଧ୍ୟ ପୋଲିସ ଘଟଣାସ୍ଥଳରେ ପହଞ୍ଚିନାହିଁ। ବୃଦ୍ଧଙ୍କ ମୃତଦେହ ଶୁକ୍ରବାର ଠାରୁ ତାଙ୍କ ଘରେ ପଡ଼ି ରହିଛି।
