ସେଞ୍ଚୁରିୟନ,୨୯|୧୨: ଘରୋଇ ଦକ୍ଷିଣ ଆଫ୍ରିକା ଓ ଭାରତ ମଧ୍ୟରେ ଚାଲିଥିବା ପ୍ରଥମ ଟେଷ୍ଟରେ ୱିକେଟ୍ କିପର ରିଷଭ ପନ୍ତ ଏକ ବିରଳ ରେକର୍ଡ ଭଙ୍ଗ କରିଛନ୍ତି । କମ୍ ଟେଷ୍ଟ ଖେଳି ୱିକେଟ୍ ପଛରେ ୧୦୦ ୱିକେଟ୍ ନେବାରେ ସହାୟତା କରିବାରେ ପନ୍ତ ରେକର୍ଡ କରିଛନ୍ତି ।
ପୂର୍ବରୁ ଭାରତୀୟ ୱିକେଟ୍ କିପରଙ୍କ ମଧ୍ୟରେ ମହେନ୍ଦ୍ର ସିଂ ଧୋନି ଓ ରିଦ୍ଧିମାନ ଶାହା ୩୬ଟି ଲେଖାଏଁ ଟେଷ୍ଟ ଖେଳି ୱିକେଟ୍ ପଛରେ ୧୦୦ ୱିକେଟ୍ ନେବାରେ ସହାୟତା କରିଥିଲେ । ପନ୍ତ ସେମାନଙ୍କ ଠାରୁ ୧୦ଟି ଟେଷ୍ଟ କମ୍ ଖେଳି ଏହି ସଫଳତା ଅର୍ଜନ କରିଛନ୍ତି ।
ମଙ୍ଗଳବାର ତେମ୍ବା ବଭୁମାଙ୍କ କ୍ୟାଚ୍ ଧରିବା ସହ ପନ୍ତ ୧୦୦ତମ ୱିକେଟ୍ ନେବାରେ ସହାୟକ ହୋଇଥିଲେ । ଅନ୍ୟ ଭାରତୀୟଙ୍କ ମଧ୍ୟରେ କିରନ ମୋରେ ୩୯ଟେଷ୍ଟ, ନୟନ ମୋଙ୍ଗିଆ ୪୧ ଓ ସୟଦ କିରମାନି ୪୨ଟେଷ୍ଟ ଖେଳି ୧୦୦ ୱିକେଟ୍ ନେବାରେ ସହାୟତା କରାଇଥିଲେ ।
