ନୂଆଦିଲ୍ଲୀ : ଅନୈତିକ ସମ୍ପର୍କରେ ଲିପ୍ତ ଥିବା ସନ୍ଦେହ କରି ଜଣେ ବ୍ୟକ୍ତି ନିଜ ପତ୍ନୀ ଓ ତାଙ୍କ ବନ୍ଧୁଙ୍କୁ ହତ୍ୟା କରିବା ଘଟଣା ଆଲୋଡ଼ନ ସୃଷ୍ଟି କରିଛି। ଅଭିଯୁକ୍ତକୁ ଦିଲ୍ଲୀ ପୁଲିସ ଗିରଫ କରିଛି। ପୁଲିସର ସୂଚନାନୁସାରେ, ହତ୍ୟାକାଣ୍ଡର ମାତ୍ର ୬ ଘଣ୍ଟା ମଧ୍ୟରେ ଏହାର ରହସ୍ୟ ଉନ୍ମୋଚିତ ହୋଇଛି।
ଡିସେମ୍ବର ୩୦ରେ ପୁଲିସକୁ ସୂଚନା ମିଳିଥିଲା ଯେ ଜଣେ ୩୦ ବର୍ଷୀୟା ମହିଳା ଏବଂ ଜଣେ ପୁରୁଷ ଗୁରୁତର ଆହତ ହୋଇ ଅରବିନ୍ଦ ମାର୍ଗର ଦୁଇ ନମ୍ବର ସଫଦରଜଙ୍ଗ ହସ୍ପିଟାଲ ଫାଟକ ନିକଟସ୍ଥ ଫୁଟପାଥରେ ରକ୍ତ ଜୁଡୁବୁଡୁ ଅବସ୍ଥାରେ ପଡ଼ିଛନ୍ତି। ପୁଲିସ ଘଟଣାସ୍ଥଳରେ ପହଞ୍ଚି ଉଭୟଙ୍କୁ ତୁରନ୍ତ ଡାକ୍ତରଖାନାରେ ଭର୍ତ୍ତି କରିଥିଲା। ଚିକିତ୍ସା ସମୟରେ ଉଭୟଙ୍କ ମୃତ୍ୟୁ ଘଟିଥିଲା। ଏହାପରେ ଅଭିଯୁକ୍ତକୁ ଗିରଫ କରିବା ପାଇଁ ପାଞ୍ଚଟି ପୁଲିସ ଟିମ୍ ଗଠନ କରାଯାଇଥିଲା।
ଅନୁସନ୍ଧାନ ବେଳେ ଜଣାପଡିଥିଲା ଯେ ମୃତ ମହିଳା ଦେଢ଼ବର୍ଷ ପୂର୍ବେ ଗନ୍ଧର୍ବ ଓରଫ ସନ୍ନିଙ୍କୁ ବିବାହ କରିଥିଲେ। ବିବାହ ପରେ ସେମାନେ ନଏଡାରେ ଏକାଠି ରହି ଏକ ହସ୍ପିଟାଲରେ କାମ କରୁଥିଲେ। ସନ୍ନିଙ୍କ ପିଲାଦିନର ବନ୍ଧୁ ସାଗର ସହ ମହିଳାଙ୍କ ବନ୍ଧୁତା ହୋଇଥିଲା। ଉଭୟେ ଅନୈତିକ ସମ୍ପର୍କରେ ଲିପ୍ତ ଥିବା ଜାଣିବା ପରେ ଗନ୍ଧର୍ବ ଦୁଇଜଣଙ୍କୁ ହାଣି ଦେଇଥିଲା ବୋଲି ପୁଲିସ ଆଗରେ ସ୍ବୀକାର କରିଛି। ପୁଲିସ ଗନ୍ଧର୍ବକୁ ଗିରଫ କରିଛି।
