ପୁଣେ ୨୮।୦୩: ରୋହିତ ଶର୍ମା ଓ ଶିଖର ଧାଓ୍ଵନଙ୍କ ଓପନିଂ ଯୋଡି ଦିନିକିଆ କ୍ରିକେଟ୍ରେ ୫୦୦୦ ରନ ପୂରଣ କରିଛନ୍ତି। ଏହା କରିବାରେ ବିଶ୍ଵର ସପ୍ତମ ଯୋଡି ହୋଇଛନ୍ତି ଏହି ଭାରତୀୟ ଯୋଡି। ରୋହିତ-ଧାଓ୍ଵନଙ୍କ ଯୋଡି ରବିବାର ଏଠାରେ ଖେଳାଯାଇଥିବା ଇଂଲଣ୍ଡ ବିପକ୍ଷ ତୃତୀୟ ତଥା ନିର୍ଣ୍ଣାୟକ ଦିନିକିଆରେ ପ୍ରଥମ ଓ୍ଵିକେଟ୍ରେ ୯୧ ବଲ୍ରେ ୧୦୩ ରନ ଭାଗିଦାରୀ ଯୋଡିଛନ୍ତି।
ରୋହିତ-ଧାଓ୍ଵନଙ୍କ ଯୋଡି ଦିନିକିଆ କ୍ରିକେଟ୍ରେ ଏ ପର୍ଯ୍ୟନ୍ତ ୫୦୨୩ ରନ ଯୋଡି ସାରିଲେଣି। ଦିନିକିଆ କ୍ରିକେଟ୍ରେ ସର୍ବାଧିକ ରନ ଭାଗିଦାରୀ କରିବାର ରେକର୍ଡ ଭାରତର ସଚିନ ତେନ୍ଦୁଲକର ଓ ସୌରଭ ଗାଙ୍ଗୁଲିଙ୍କ ନାମରେ ରହିଛି। ଏହି ଯୋଡି ନିଜ ସମୟରେ ୮୨୨୭ ରନ ଭାଗିଦାରୀ କରିଥିଲେ। ଏହା ପରେ ଦ୍ଵିତୀୟରେ ଅଛନ୍ତି ଶ୍ରୀଲଙ୍କାର କୁମାର ସାଙ୍ଗାକାରା ଓ ମୋହେଲା ଜୟବର୍ଦ୍ଧନେ।
ଏହି ଯୋଡିଙ୍କ ନାମରେ ୫୯୯୨ ରନର ଭାଗିଦାରୀ ରେକର୍ଡ ରହିଛି। ଶ୍ରୀଲଙ୍କାର ତିଳକରତ୍ନେ ଦିଲସାନ ଓ କୁମାର ସାଙ୍ଗାକାରାଙ୍କ ଯୋଡି ୫୪୭୫ ରନର ଭାଗିଦାରୀ କରିଛନ୍ତି। ସେହି ଶ୍ରୀଲଙ୍କାର ଜୟସୁରିୟା ଓ ମାର୍ଭନ ଆଟ୍ଟାପାଟୁର ଯୋଡି ନାମରେ ୫୪୬୨ ରନର ଭାଗିଦାରୀ ରେକର୍ଡ ରହିଛି।
