ଦିବ୍ରୁଗଡ ୨୩/୧୧ : ଆସାମର ପୂର୍ବତନ ମୁଖ୍ୟମନ୍ତ୍ରୀ ତରୁଣ ଗୋଗୋଇଙ୍କ ସ୍ୱାସ୍ଥ୍ୟବସ୍ଥା ଗୁରୁତର ରହିଛି। ତାଙ୍କ ଦେଖାଶୁଣା କରୁଥିବା ଡାକ୍ତର କହିଛନ୍ତି ଯେ, ତରୁଣ ଗୋଗୋଇଙ୍କ ସ୍ୱାସ୍ଥ୍ୟବସ୍ଥା ସଙ୍କଟାପନ୍ନ ରହିଛି। ପୂର୍ବତନ ମୁଖ୍ୟମନ୍ତ୍ରୀଙ୍କ ସ୍ୱାସ୍ଥ୍ୟବସ୍ଥାକୁ ଦୃଷ୍ଟିରେ ରଖି ଆସାମ ମୁଖ୍ୟମନ୍ତ୍ରୀ ସର୍ବାନନ୍ଦ ସୋନୋବାଲ ଦିବ୍ରୁଗଡ କାର୍ଯ୍ୟକ୍ରମ ରଦ୍ଦ କରି ଗୁଆହାଟୀ ଯାଉଛନ୍ତି। ସର୍ବାନନ୍ଦ ସୋନୋବାଲ ଟ୍ୱିଟ କରି ଏ ସମ୍ପର୍କରେ ସୂଚନା ଦେଇଛନ୍ତି। ସେ ଟ୍ୱିଟରେ ଲେଖିଛନ୍ତି, ‘ମୁଁ ଦିବ୍ରୁଗଡରେ ହେବାକୁଥିବା କାର୍ଯ୍ୟକ୍ରମ ରଦ୍ଦ କରି ତରୁଣ ଗୋଗୋଇଙ୍କୁ ଦେଖିବାକୁ ଗୁଆହାଟୀ ଫେରିଯାଉଛି। ପୂର୍ବତନ ମୁଖ୍ୟମନ୍ତ୍ରୀଙ୍କ ସ୍ୱାସ୍ଥ୍ୟବସ୍ଥା ଗୁରୁତର ରହିଛି। ସେ ମୋ ପାଇଁ ପିତା ସମାନ। ମୁଁ ତାଙ୍କର ସୁସ୍ଥ କାମନା କରୁଛି।’
ଗୁଆହାଟୀ ମେଡିକାଲ କଲେଜ ଅଧିକ୍ଷକ ଅଭିଜିତ ଶର୍ମା କହିଛନ୍ତି ଯେ ୮୪ ବର୍ଷ ବୟସ୍କ ବରିଷ୍ଠ କଂଗ୍ରେସ ନେତାଙ୍କ ଦେଖରେଖ ଡାକ୍ତରଙ୍କ ଏକ ଟିମ କରୁଛି। ତାଙ୍କ ସ୍ୱାସ୍ଥ୍ୟବସ୍ଥା ଅତ୍ୟନ୍ତ ଗୁରୁତର ରହିଛି।
