ଓରେଗନ୍: ଆମେରିକାର ଓରେଗନ୍ ଅନ୍ତର୍ଗତ ପୋର୍ଟଲାଣ୍ଡ୍ ଉପନଗରୀରେ ଥିବା ‘ଲାଇଟ୍-ରେଲ୍ ଟ୍ରେନ୍ ପ୍ଲାଟ୍ଫର୍ମ’ରେ ଜଣେ ବୃଦ୍ଧଙ୍କ କାନ ଏବଂ ମୁହଁର କିଛି ଅଂଶ କାମୁଡ଼ି ଛିଡ଼ାଇ ଦେଇଥିବା ଅଭିଯୋଗରେ ଜଣେ ୨୫ ବର୍ଷିୟ ଯୁବକଙ୍କୁ ଗିରଫ କରାଯାଇଥିବା କଥା ମଙ୍ଗଳବାର ଦିନ ସରକାରୀ ଅଧିକାରୀମାନେ କହିଛନ୍ତି।
ଗ୍ରେସାମ୍ ପୁଲିସ ବିଭାଗ କହିଛି, ଗ୍ରେସାମ୍ସ୍ଥିତ କ୍ଲେଭ୍ଲାଣ୍ଡ୍ ଆଭେନ୍ୟୁ ମ୍ୟାକ୍ସ୍ ପ୍ଲାଟ୍ଫର୍ମରେ ଛୁରାମାଡ଼ ଚାଲିଛି ବୋଲି ରାତି ୨.୧୫ରେ ପୁଲିସ ଅଧିକାରୀ ଓ ଜଣେ ମଲ୍ଟ୍ନୋମା କାଉଣ୍ଟି ଡେପୁଟି ଖବର ପାଇଥିଲେ। ତଳେ ବହୁ ପରିମାଣର ରକ୍ତ ପଡ଼ିଥିବା ଦେଖି ପ୍ରତ୍ୟକ୍ଷଦର୍ଶୀମାନେ ପୁଲିସକୁ ଛୁରାମାଡ଼ ହେଉଛି ବୋଲି ପୁଲିସକୁ କହିଥିଲେ।
ପୁଲିସ ତୁରନ୍ତ ଘଟଣାସ୍ଥଳରେ ପହଞ୍ଚି ଦେଖିଲା ଯେ, ସନ୍ଦିଗ୍ଧ ପୀଡ଼ିତଙ୍କୁ ମାଡ଼ିବସି ଆକ୍ରମଣ କରୁଛି। ସେମାନେ ସନ୍ଦିଗ୍ଧକୁ ଧରି ହାଜତକୁ ନେବା ସହିତ ହିଲ୍ସ୍ବରୋର ୭୮ ବର୍ଷୀୟ ଉକ୍ତ ପୀଡ଼ିତଙ୍କ ଚିକିତ୍ସା ନିମନ୍ତେ ପାରାମେଡିକ୍ମାନଙ୍କୁ ଡକାଇଥିଲେ।
ପୁଲିସ କହିଛି, ପୀଡ଼ିତଙ୍କୁ ଛୁରାମାଡ଼ କରାଯାଇନାହିଁ। ସନ୍ଦିଗ୍ଧ ତାଙ୍କର କାନ ଓ ମୁହଁର କିଛି ଅଂଶ କାମୁଡ଼ି ଛିଡ଼ାଇ ଦେଇଛନ୍ତି। କ୍ଷତ ଏତେ ଗଭୀର ହୋଇଛି ଯେ, ପୀଡ଼ିତଙ୍କ ଖପୁରି ଦେଖାଯାଉଛି।
ସନ୍ଦିଗ୍ଧଜଣକ ହେଉଛନ୍ତି ନିକଟ ଅତୀତରେ ଜର୍ଜିଆରୁ ତଡ଼ାଖାଇ ପୋର୍ଟଲାଣ୍ଡ୍କୁ ଆସିଥିବା ୨୫ ବର୍ଷିୟ କୋରିନ୍ କ୍ରାଏମର୍। ବୃଦ୍ଧଙ୍କୁ ଆକ୍ରମଣ କରିବା ସମୟରେ ସେ ମଦ୍ୟପାନ କରିବା ସହିତ କୃତ୍ରିମ ଅଫିମ ଓ ଗଞ୍ଜେଇ ଖାଇଥିଲା ବୋଲି ସ୍ବୀକାର କରିଥିବା କଥା ‘କେଏଟିୟୁ ନିଉଜ୍’ ରିପୋର୍ଟ କରିଛି।
