ଟୋକିଓ ୧୮/୭ : ଟୋକିଓ ଅଲିମ୍ପିକ୍ସରେ ଲାଗିଯାଇଛି କରୋନା ଗ୍ରହଣ । ଟୋକିଓ ଅଲିମ୍ପିକ୍ସର କ୍ରୀଡା ଗ୍ରାମରେ ଆଉ ଦୁଇଜଣ ଆଥଲେଟ୍ କରୋନା ସଂକ୍ରମିତ ହୋଇଛନ୍ତି । କରୋନା ସଂକ୍ରମଣର ଏହା ହେଉଛି ତୃତୀୟ ମାମଲା । ଏହା ପୂର୍ବରୁ ମଧ୍ୟ ଜଣେ ଆଥଲେଟ୍ କରୋନା ପଜିଟିଭ୍ ହୋଇଥିଲେ । ଟୋକିଓ ଅଧିକାରୀ କହିଛନ୍ତି ଯେ ସଂକ୍ରମିତ ଆଥଲେଟମାନଙ୍କୁ ୧୪ ଦିନିଆ ସଂଗରୋଧରେ ରହିବାକୁ ପଠାଯାଇଛି ।
ଆୟୋଜକ କମିଟିର ଅଧ୍ୟକ୍ଷ ସେଇକୋ ହାସିମୋଟୋଙ୍କ ସମେତ ଅନ୍ୟ ଅଧିକାରୀମାନେ ଏହି ମାମଲାକୁ ନିଶ୍ଚିତ କରିଛନ୍ତି । ଆୟୋଜକ କମିଟିର ସିଇଓ ତୋଷିରୋ ମୁଟୋ କହିଛନ୍ତି, ଯଦି ସାମ୍ପ୍ରତିକ ପରିସ୍ଥିତିରେ ସଂକ୍ରମଣ ମାମଲା ବଢେ ତାହେଲେଲ ଅନିଶ୍ଚିତତା ଭିତରେ ରହିପାରେ । ଅଲିମ୍ପିକ୍ କ୍ରୀଡା ଗ୍ରାମରେ ଅଲିମ୍ପିକ୍ସ ସମୟରେ ପ୍ରାୟ ୧୧,୦୦୦ ଆଥଲେଟ୍ ଏବଂ ହଜାର ହଜାର କର୍ମଚାରୀ ରହିବାର ବ୍ୟବସ୍ଥା ହୋଇଛି ।
ସେପଟେ ଅନ୍ତର୍ଜାତୀୟ ଅଲିମ୍ପିକ୍ କମିଟି (ଆଇଓସି) ସଭାପତି ଥୋମାସ୍ ବାଚ୍ ଏହି ସପ୍ତାହ ପୂର୍ବରୁ କହିଥିଲେ ଯେ ଜାପାନର ଗେମ୍ସ ଗ୍ରାମରେ ଖେଳାଳି କିମ୍ବା ଗାଁର ଅନ୍ୟ ବାସିନ୍ଦାଙ୍କ ଦ୍ୱାରା ଭୂତାଣୁ ସଂକ୍ରମଣ ହେବାର ଆଶଙ୍କା କମ୍ ଅଛି ।
