ଟୋକିଓ ୧୭।୦୭: ଟୋକିଓ ଅଲିମ୍ପିକ୍ସ ଉପରେ ବଢିବାରେ ଲାଗିଛି ସଂକଟର କଳାବାଦଲ । ଖାସ୍ କରି ଏଠାରେ ଦାଉ ସାଧିଛି କରୋନାର ଗ୍ରହଣ । ସ୍ପୋର୍ଟସ୍ ଭିଲେଜ କମ୍ପ୍ଲେକ୍ସରେ ପ୍ରଥମ କରି କରୋନା କେସ ନଜର ଆସିଥିବା ଅଲିମ୍ପିକ୍ ଆୟୋଜକମାନେ ନିଶ୍ଚିତ କରିଛନ୍ତି । ଫଳରେ ବଢିଛି ଏଠାରେ କରୋନା ସଂକ୍ରମଣ ମାମଲା । ଆସନ୍ତା ୨୩ରେ ଆରମ୍ଭ ହେବାକୁ ଅଛି ଖେଳର ମହାକୁମ୍ଭ ।
ଯାହାକୁ ନେଇ ଏବେଠାରୁ ଦେଖାଦେଲାଣି ଅନିଶ୍ଚିତତା । କ୍ରୀଡା ଗ୍ରାମରେ କରୋନା ମାମଲା ନଜର ଆସିବା ପରେ ଅଲିମ୍ପିକ୍ସର ଆୟୋଜନ ଉପରେ ଅନେକ ପ୍ରଶ୍ନ ଉଠିଛି । କୋଭିଡ -୧୯ ବିଶ୍ୱ ମହାମାରୀକୁ ଦୃଷ୍ଟିରେ ରଖି ଟୋକିଓରେ ୬ ସପ୍ତାହ ଧରି ଜରୁରୀକାଳୀନ ପରିସ୍ଥିତି ବଳବତ୍ତର ରହିଛି । ତଥାପି ଗତ କିଛି ଦିନ ମଧ୍ୟରେ ଟୋକିଓରେ ସଂକ୍ରମିତ କରୋନା ସଂଖ୍ୟା ଯଥେଷ୍ଟ ବୃଦ୍ଧି ପାଇଛି ।
ଅଲିମ୍ପିକ୍ କ୍ରୀଡା ଗ୍ରାମରେ ଏହି କରୋନା ମାମଲା ଏପରି ଏକ ସମୟରେ ଆସିଛି ଯେତେବେଳେ ଖେଳ ଆରମ୍ଭ ପାଇଁ ମାତ୍ର ୬ ଦିନ ବାକି ଅଛି । ଟୋକିଓରେ କରୋନା ପ୍ରଭାବ ଅତ୍ୟଧିକ ନହେବା ପାଇଁ ଜାପାନ ସରକାର ସମସ୍ତ ଆବଶ୍ୟକୀୟ ପଦକ୍ଷେପ ନେଇଛନ୍ତି । କିନ୍ତୁ ଏହା ସତ୍ତ୍ୱେ ରାଜଧାନୀରେ କରୋନା ସଂକ୍ରମିତଙ୍କ ସଂଖ୍ୟା କ୍ରମାଗତ ଭାବେ ବୃଦ୍ଧି ପାଉଛି । ଯାହା ଏକ ଚିନ୍ତାର ବିଷୟ । ଏହି ସପ୍ତାହରେ, ଟୋକିଓରେ ଗତ ୬ ମାସ ମଧ୍ୟରେ ସର୍ବାଧିକ କରୋନା ମାମଲା ରହିଥିଲା। ଏହାପୂର୍ବରୁ, ଅନେକ ଦେଶ କରୋନା ସଂକ୍ରମଣକୁ ଦୃଷ୍ଟିରେ ରଖି ଟୋକିଓକୁ ସେମାନଙ୍କ ଆଥଲେଟ୍ ପଠାଇବାକୁ ମନା କରିଦେଇଥିଲେ ।
