ବୋକାରୋ: ଗୁରୁବାର ରାତିରେ ଝାଡ଼ଖଣ୍ଡର ବୋକାରୋସ୍ଥିତ ‘ଷ୍ଟିଲ୍ ଅଥରିଟି ଅଫ୍ ଇଣ୍ଡିଆ’ର (ସେଲ୍) ‘ବୋକାରୋ ଷ୍ଟିଲ୍ ପ୍ଲାଣ୍ଟ୍’ର (ବିଏସ୍ଏଲ୍) ‘ଷ୍ଟିଲ୍ ମେଲ୍ଟିଙ୍ଗ୍ ସପ୍’ରେ ଭୟଙ୍କର ଅଗ୍ନିକାଣ୍ଡ ଘଟିଥିବା କଥା ଜଣେ ସରକାରୀ ଅଧିକାରୀ କହିଛନ୍ତି।
ନିଆଁ ଲିଭାଇବା ଲାଗି ୫ଟି ଦମକଳ ମୁତୟନ କରାଯାଇଥିଲା। ଏହି ଅଗ୍ନିକାଣ୍ଡ ଯୋଗୁଁ କେହି ମୃତାହତ ହୋଇଥିବାର ସୂଚନା ଏପର୍ଯ୍ୟନ୍ତ ମିଳିନାହିଁ।
ଗଣମାଧ୍ୟମକୁ ‘ବୋକାରୋ ଇସ୍ପାତ କାରଖାନାର ମୁଖ୍ୟ ଜନସମ୍ପର୍କ ଅଧିକାରୀ ମଣିକାନ୍ତ ଧନ୍ କହିଛନ୍ତି, ‘ଷ୍ଟିଲ୍ ମେଲ୍ଟିଙ୍ଗ୍ ସପ୍-୨’ର ‘କାଷ୍ଟର୍ ୨’ର ‘ଟନ୍ଡିସ୍-୩’ରେ ତରଳ ଧାତୁ ଲିକ୍ ହେବାରୁ ‘କାଷ୍ଟର୍’ରେ ନିଆଁ ଲାଗିଛି। ନିଆଁ ଲିଭାଇବା ପାଇଁ ଦମକଳ ମୁତୟନ କରାଯାଇଛି। ଏପର୍ଯ୍ୟନ୍ତ କେହି ମୃତାହତ ହୋଇଥିବାର ସୂଚନା ମିଳିନାହିଁ। ଘଟଣାର ସବିଶେଷ ବିବରଣୀ ଜାଣିବାକୁ ଅପେକ୍ଷା କରାଯାଇଛି।
ନିଆଁ ଲାଗିବାର ପ୍ରକୃତ କାରଣ ଜାଣିବା ଲାଗି ତଦନ୍ତ କରାଯିବ। ଉତ୍ତପ୍ତ ତରଳ ଧାତୁ ‘ଲିକ୍’ କରିବାରୁ ରାତି ପ୍ରାୟ ୧୧ଟା ବେଳେ ନିଆଁ ଲାଗିଥିଲା। ଏହି ଅଗ୍ନିକାଣ୍ଡ ଯୋଗୁଁ , ‘ଷ୍ଟିଲ୍ ମେଲ୍ଟିଙ୍ଗ୍ ସପ୍-୨’ର ଟନ୍ଡିସ୍ କାର୍ ଓ ‘କାଷ୍ଟର୍-୨’ର ବହୁଳାଂଶ ପୋଡ଼ି ନଷ୍ଟ ହୋଇଯାଇଛି ବୋଲି ସେ କହିଛନ୍ତି।
‘ସେଲ୍’ର ଆଉ ଜଣେ ଅଧିକାରୀ କହିଛନ୍ତି ଯେ, ଅଗ୍ନିକାଣ୍ଡ ସମୟରେ ‘ଅଟୋମେଟେଡ୍ ୟୁନିଟ୍’ରେ କୌଣସି ଶ୍ରମିକ ନ ଥିଲେ।
ସୂଚନାଯୋଗ୍ୟ, ୧୦,୦୦୦ ଏକର ଜମିରେ ଅବସ୍ଥିତ ଏହି ଇସ୍ପାତ କାରଖାନାରେ ପ୍ରାୟ ୧୦୦୦ ଶ୍ରମିକ କାର୍ଯ୍ୟ କରନ୍ତି।
