ନୂଆଦିଲ୍ଲୀ, ୨୦।୦୫ : ଭାରତରେ କରୋନାର ଦ୍ୱିତୀୟ ଲହର ଜୁଲାଇ ମାସରେ କମିଯିବ । କିନ୍ତୁ ୬ରୁ ୮ ମାସ ପରେ ଆସିବ ତୃତୀୟ ଲହର । ଭାରତ ସରକାରଙ୍କ ବିଜ୍ଞାନ ମନ୍ତ୍ରାଳୟର ତିନି ବୈଜ୍ଞାନିକଙ୍କୁ ନେଇ ଗଠିତ ଏକ କମିଟି ଏହି ଅନୁମାନ କରିଛି । ଏହାସହ ଭାରତ ସରକାରଙ୍କୁ ମଧ୍ୟ ସତର୍କ କରାଇଛି ।
ସୂତ୍ର ମଡେଲକୁ ଉପଯୋଗ କରି ବୈଜ୍ଞାନିକମାନେ ଭବିଷ୍ୟତବାଣୀ କରିଛନ୍ତି ଯେ, ମେ ଶେଷରେ ଦୈନିକ ଦେଢ ଲକ୍ଷ କେସ୍ ସାମ୍ନାକୁ ଆସିବ । ଜୁନ ଶେଷରେ ଏହା ୨୦ ହଜାର ତଳକୁ ଖସିବ । ଜୁଲାଇ ସୁଦ୍ଧା କରୋନାର ଦ୍ୱିତୀୟ ଲହର ଥମିଯିବ ।
କମିଟିର ସଦସ୍ୟ ତଥା ଆଇଆଇଟି କାନପୁରର ପ୍ରଫେସର ମନିନ୍ଦ୍ର ଅଗ୍ରଓ୍ୱାଲ କହିଛନ୍ତି ଯେ, ଉତ୍ତର ପ୍ରଦେଶ, ମହାରାଷ୍ଟ୍ର, କର୍ଣ୍ଣାଟକ, ମଧ୍ୟପ୍ରଦେଶ, ଝାଡଖଣ୍ଡ, ରାଜସ୍ଥାନ, କେରଳ, ସିକିମ, ଉତରାଖଣ୍ଡ, ଗୁଜୁରାଟ, ହରିୟାଣା, ଗୋଆ ଓ ଦିଲ୍ଲୀରେ ଦ୍ୱିତୀୟ ଲହର ପିକ୍ରେ ପହଁଚି ସାରିଛି । ତାମିଲନାଡୁରେ ମେ ୨୯ରୁ ମେ ୩୧ ମଧ୍ୟରେ ପଣ୍ଡିଚେରୀରେ ମେ ୧୯-୨୦ରେ ସଂକ୍ରମଣ ପିକ୍ରେ ପହଁଚିବ । ପୂର୍ବ ଓ ପୂର୍ବତ୍ତୋର ରାଜ୍ୟ ଗୁଡିକରେ ଏବେ ସୁଦ୍ଧା ସଂକ୍ରମଣ ପିକ୍ରେ ପହଁଚି ନାହିଁ ।
ବୈଜ୍ଞାନିକମାନେ ଆହୁରି କହିଛନ୍ତି ଯେ, ୬ରୁ ୮ ମାସ ମଧ୍ୟରେ ତୃତୀୟ ଲହରି ଆସିପାରେ ଏହା କିନ୍ତୁ ସାରା ଦେଶେରେ ନହୋଇ କିଛି ସ୍ଥାନରେ ପ୍ରକୋପ ଦେଖାଇବ । ଏଥିରେ ବହୁତ ଲୋକ ପ୍ରଭାବିତ ହେବେ ନାହିଁ କାରଣ ଅନେକ ଟିକା ନେଇ ସାରିଥିଲେ । ଅକ୍ଟୋବର ପରେ ହିଁ ତୃତୀୟ ଲହରି ଆସିପାରେ ।
ସୂଚନାଯୋଗ୍ୟ, ସୂତ୍ର ମଡେଲ ଦେଶରେ କରୋନାକୁ ନେଇ ଅନେକ ଅନୁମାନ ଲଗାଇଥାଏ । ତେବେ କରୋନା ମୁକାବିଲା ପାଇଁ ବୈଜ୍ଞାନିକଙ୍କୁ ନେଉ ନେଇ ଗଠିତ ୩ ଜଣିଆ କମିଟି ଦ୍ୱିତୀୟ ଲହରର ପ୍ରକୃତିକୁ ନେଇ ଅନୁମାନ ଲଗାଇବାରେ ଅସମର୍ଥ ହୋଇଥିଲା ।
