ଉମରକୋଟ ୨।୭: ନବରଙ୍ଗପୁର ଜିଲ୍ଲା ଉମରକୋଟ ବନ ବିଭାଗକୁ ମିଳିଛି ବଡ଼ ସଫଳତା । କଲରା ପତରିଆ ବାଘ ଛାଲ ଚାଲାଣ ହେଉଥିବା ସମୟରେ ଚାଲାଣକାରୀଙ୍କୁ ଧରିବାରେ ସଫଳ ହୋଇଛି ବନ ବିଭାଗ ଟିମ୍ । ଚାଲାଣକାରୀଙ୍କ ଠାରୁ ଏକ କଲରା ପତରିଆ ବାଘର ଚମଡା ଜବତ କରାଯାଇଛି ।
ସୂଚନାଯୋଗ୍ୟ ଯେ, ନବରଙ୍ଗପୁର ଜିଲ୍ଲା ଝରିଗାଁ ବ୍ଲକ୍ ଅନ୍ତର୍ଗତ ବେଲଗାଁ ଗ୍ରାମର ଅନନ୍ତ ପନକା ନାମକ ଜଣେ ବ୍ୟକ୍ତି ରାଇଘର ବ୍ଲକ୍ ଅନ୍ତର୍ଗତ କିରା ପାଣି ଗ୍ରାମର ବନ ସାନ୍ତାଙ୍କ ନିକଟରୁ ଏକ କଲରା ପତରିଆ ବାଘ ଛାଲ ନେଇଥିଲେ । ନବରଙ୍ଗପୁର ତାରାଗାଁର ଜଗନ୍ନାଥ ହରିଜନ ନାମକ ଜଣେ ବ୍ୟବସାୟୀଙ୍କ ନିକଟକୁ ନେଇ ଯାଉଥିଲେ । ଏହି ସମୟରେ ଉମରକୋଟ ନିକଟସ୍ଥ ସେମଲା ଗ୍ରାମ ନିକଟରେ ଉମରକୋଟ ବନ ବିଭାଗ ସହ ଡ଼ାବୁଗାଁ ବନ ବିଭାଗ ଓ ରାଇଘର ବନ ବିଭାଗର ଟିମ୍ ମିଳିତ ଭାବରେ ଚଢ଼ାଉ କରିଥିଲା ।
ଏହି ଚଢାଉରେ ମୋଟ୍ ୩୫ ଜଣ ସଦସ୍ୟ ରହିଥିଲେ । ଏ ନେଇ ଉମରକୋଟ ବନ ବିଭାଗ ଦ୍ବାରା କେସ୍ ନମ୍ବର ୫୭/୨୨-୨୩ରେ ଏକ ମାମଲା ରୁଜ୍ଜୁ କରାଯାଇଛି । ବନ୍ୟଜନ୍ତୁ ଆକ୍ଟ ୧୯୭୨ର ଧାରା ୨,୯,୩୯,୪୦,୪୮ ଓ ପେନାଲ ୫୧ ଲଗାଯାଇଛି। ଏହି ବାଘ ଛାଲ ଚାଲାଣରେ ଅନ୍ୟ କେଉଁମାନେ ସଂପୃକ୍ତ ରହିଛନ୍ତି ତାହା ତଦନ୍ତ ପରେ ଜଣା ପଡ଼ିବ ବୋଲି ଉମରକୋଟ ରେଞ୍ଜର ପୂର୍ଣ୍ଣ ଚନ୍ଦ୍ର ନାୟକ କହିଛନ୍ତି ।
