ନୂଆଦିଲ୍ଲୀ ୦୨/୦୮: ଆମେରିକାରେ ଥମୁନି ଗୁଳିକାଣ୍ଡ ଘଟଣା । ଲଗାତର ଘଟୁଛି ଅଘଟଣ । ପୁଣି ଗୁଳିମାଡରେ ଥରିଛି ଓ୍ୱାଶିଂଟନ୍ । ସହରର ଏକ ଆପାର୍ଟମେଣ୍ଟରେ ଗୁଳିକାଣ୍ଡ ଘଟିବାରୁ ଏକାଧିକ ପ୍ରାଣ ହରାଇଛନ୍ତି । ଏହାସହ ୫ ଜଣ ଆହତ ହୋଇଛନ୍ତି ।
ସୂଚନାନୁସାରେ, ସୋମବାର ବିଳମ୍ବିତ ରାତ୍ରରେ ଓ୍ୱାଶିଂଟନର ଉତ୍ତରପୂର୍ବ ପ୍ରାନ୍ତରେ ଥିବା ଏକ ଆପାର୍ଟମେଣ୍ଟରେ ଗୁଳିକାଣ୍ଡ ଘଟିଥିଲା । ଜଣେ ଦୁର୍ବୃତ୍ତ ହଠାତ ଆଖିବୁଜା ଗୁଳିମାଡ କରିଥିଲେ । ଏଥିରେ ଅନେକ ମୃତାହତ ହୋଇଥିବା ଜଣାପଡିଛି । କିନ୍ତୁ ସ୍ଥାନୀୟ ପୋଲିସ ଜଣଙ୍କର ମୃତ୍ୟୁ ହୋଇଥିବା କହିଛି । ଏହାସହ ଅନ୍ୟ ୫ ଜଣ ଆହତ ହୋଇଛନ୍ତି ।
ମେଟ୍ରୋପୋଲିଅନ ପୋଲିସ ବିଭାଗ କହିଛି ଯେ, ଆପ୍ରାଟମେଣ୍ଟର ୧୫୦୦ ବ୍ଲକରେ ଏହି ଘଟଣା ଘଟିଥିଲା । ତେବେ ପ୍ରକୃତରେ କେତେ ପ୍ରାଣ ହରାଇଛନ୍ତି ତାହା ସ୍ପଷ୍ଟ ହୋଇପାରି ନାହିଁ । ଏବେବି ତଦନ୍ତ ଜାରି ରହିଛି । ମୃତାହତଙ୍କ ସମ୍ପର୍କରେ ପୋଲିସ କିଛି ସୂଚନା ଦେଇନାହିଁ ।
ସୂଚନାଯୋଗ୍ୟ, ଏହାପୂର୍ବରୁ ଆମେରିକାର ଅନେକ ସ୍ଥାନରେ ଗୁଳିକାଣ୍ଡ ଘଟିଥିଲା । ନିକଟରେ ଏକ ଶ୍ମଶାନ ଓ ସ୍କୁଲରେ ଗୁଳିକାଣ୍ଡରେ ୩୦ରୁ ଅଧିକ ଜଣ ପ୍ରାଣ ହରାଇଥିଲେ । ଯାହାପରେ ରାଷ୍ଟ୍ରପତି ଜୋ ବାଇଡେନ୍ ବନ୍ଧୁକ ଲାଇସେନ୍ସ ନିୟମ ପରିବର୍ତ୍ତନ ବାବଦରେ ବିଚାର କରିଥିଲେ ।
